Diddy tekjuhæsti rapparinn

Rapparinn og athafnamaður Diddy, eins og hann er kallaður í dag, er tekjuhæsti rapparinn samkvæmt lista Forbes tímaritsins. Sean “Diddy” Combs, sem hefur verið kallaður ýmsum nöfnum í gegnum tíðina líkt og P Diddy eða Puff Daddy, þénaði rúma sex milljarða króna á síðasta ári.

Diddy er mikill athafnamaður en hann er með ýmislegt á sínum snærum, líkt og vodka framleiðandann Ciroc, fatalínuna Sean Jean og sjónvarpsstöðina Revolt.

Í öðru sæti listans situr Jay Z sem þénaði rúma fimm milljarða króna á síðasta ári. Jay Z seldi hlut sinn í bandaríska NBA körfuknattleiksliðinu Brooklyn Nets á árinu og þá seldist nýjasta plata hans, Magna Carta Holy Grail mjög vel um allan heim.

Dr. Dre situr í þriðja sætinu en hann þénaði tæpa fjóra milljarða króna á síðasta ári. Þá er Nicki Minaj í fjórða sætinu með tekjur upp á þrjá og hálfan milljarð króna.