Þrælar láta lífið fyrir HM í Katar

Tugir verkamanna frá Nepal hafa látið lífið í Katar undanfarnar vikur við undirbúningsvinnu fyrir heimsmeistaramótið í knattspyrnu árið 2022.

Guardian hefur rannsakað málið og birtir ítarlega fréttaskýringu um málið á myndbandsformi á vef sínum. Auk hinna látnu vinna þúsundir við aðstæður sem falla undir skilgreiningu Alþjóðavinnumálastofnunar (ILO) á þrælahaldi.

Samkvæmt gögnum frá sendiráði Nepal í Doha létu í það minnsta 44 verkamenn lífið á tímabilinu 4. júní til 8. ágúst. Rúmlega helmingur lést af völdum hjartaáfalls, hjartabilunar eða slys á verkstað.

Undirbúningur fyrir HM 2022 er í fullum gangi í Katar. Verkamenn skipta þúsundum og eru flestir frá Nepal. Fjölmargir fullyrða að þeir hafi ekki fengið laun sín greidd og launum haldið til að koma í veg fyrir að þeir hlaupist á brott.

Þá er fullyrt að verkamenn hafi takmarkaðan aðgang að vatni í steikjandi hitanum ytra. Um þrjátíu verkamenn frá Nepal flúðu í sendiráðið í Doha og sóttu um hæli vegna aðstæðna sinna.

„Við viljum hætta störfum en fyrirtækið leyfir það ekki,“ segir einn Nepalanna sem starfar hjá Lusail City. Fyrirtækið ber ábyrgð á 90 þúsund manna knattspyrnuleikvangi sem er í byggingu.

„Ég er reiður yfir því hvernig fyrirtækið kemur fram við okkur en við erum bjargarlausir. Ég sé eftir því að hafa komið hingað en hvað eigum við að gera?“

Alþjóðaknattspyrnusambandið, FIFA, hefur ekki brugðist við umfjöllun Guardian þegar þetta er skrifað. Skipuleggjendur heimsmeistaramótsins segja í samtali við BBC að málið verði tekið til skoðunar.

Umfjöllun Guardian má sjá hér.