Mynd Róberts Douglas frumsýnd á opnunarhátíð Riff í kvöld

Alþjóðlega kvikmyndahátíðin í Reykjavík, RIFF, verður sett í kvöld. Hátíðin stendur til 11. október.

Í ellefu daga á hverju hausti flykkjast Íslendingar í bíó á alþjóðlega kvikmyndahátíð. Hátíðin er einnig mikilvægur vettvangur fyrir íslenska kvikmyndagerðamenn til að kynna verk sín fyrir umheiminum.

„Opnunarhófið er í kvöld í stóra salnum í Háskólabíó og þá verður frumsýnd á Íslandi nýjasta mynd Róberts Douglas, Svona er sanlitun,“ segir Dr. Gunni sem er kynningarfulltrúi hátíðarinnar.

Dagskráin er þétt næstu tvær vikurnar.

„Við sýnum hátt í hundrað myndir í fullri lengd, leiknar myndir og heimildamyndir, af öllum stærðum og gerðum. Myndirnar koma frá samtals yfir fjörtíu löndum og á annað hundrað erlendra gesta koma úr kvikmyndheiminum sem kynna verk sín og taka þátt í íslenskum bransadögum,“ segir Gunni.

 

Hátíðin á tíu ára afmæli í ár og af því tilefni veitir RIFF þremur leikstjórum verðlaun fyrir framúrskarandi listfengi. Þeir eru Lukas Moodysson, Laurent Cantet og James Gray.

Hægt er að kynna sér dagskrána á heimasíðu hátíðarinnar.