Starfsmenn RARIK berja ís af raflínum

Björgunarsveitamenn frá Varmahlíð og Sauðárkróki voru svo kallaðar út um klukkan fimm í morgun til að aðstoða starfsmenn RARIK við að berja ís af raflínum. Ekki er vitað hvenær því verki verður lokið, að því er segir í tilkynningu frá Landsbjörgu.

Um 70 manns gistu í fjöldahjálparstöðinni í Hofgarði í Öræfum í nótt en um er að ræða ferðalanga sem björgunarsveitir sóttu á Skeiðarársand í gærkvöldi í miklum veðurham sem og þá sem höfðu komið sér sjálfir í skjól í Freysnesi. Að sögn upplýsingafulltrúa Landsbjargar hafði fólkið lent í grjótfoki og eru margir bílar illa farnir, rúður jafnvel brotnar auk þess sem hurðir fuku upp.

Brynvarinn bíll Björgunarsveitarinnar Kára í Öræfum var notaður til að sækja fólkið og fór hann síðan undir miðnætti áleiðis í Jökulsárlón og á Skeiðarársand til að athuga hvort fleiri ferðamenn þörfnuðust aðstoðar.

Í gærkvöldi geysaði aftakaveður í vesturhluta Mýrdals. Björgunarsveitin Víkverji frá Vík hafði í nógu að snúast við að hefta fok, við bæina frá Pétursey og vestur úr varð nokkurt tjón á útihúsum en íbúðarhús sluppu. Veðurofsinn var slíkur að stór vörubíll sem notaður er til malarflutninga fauk á hliðina á bæjarhlaðinu við Pétursey.

Björgunarsveitir víða um land höfðu í nægu að snúast í gærkvöldi og var flestum verkefnum lokið á fjórða tímanum í nótt en veðrið tók að ganga niður um miðnættið.  Á Laugarvatni þurfti að festa þak á íbúðarhúsi og tryggja hurð á útigeymslu sem var við að fjúka upp og í Vestamannaeyjum var björgunarsveit kölluð út þegar þakplötur fóru að fjúka af íbúðarhúsi.  Þá voru björgunarsveitirnar á Hvammstanga, Skagaströnd og Blönduósi á Kili fram á nótt og aðstoðuðu þar ferðafólk sem hafði fest bíla sína.