Hundruð milljóna í boði klukkan 16

FH tekur á móti Austria Vín í síðari leik liðanna í 3. umferð forkeppni Meistaradeildar Evrópu í knattspyrnu í dag. Leikurinn hefst klukkan 16.

Óhætt er að fullyrða að leikurinn í dag sé einn sá stærsti sem íslenskt félagslið hafi spilað. Austria Vín vann 1-0 sigur í fyrri leiknum og því enn möguleiki fyrir FH-inga að snúa blaðinu við þótt andstæðingurinn sé sterkur.

Sigurvegarinn í einvígi liðanna kemst í umspil um sæti í riðlakeppni Meistaradeildar Evrópu. Ljóst er að þar fengi sigurliðið gríðarlega erfiðan andstæðing. Tap á því stigi keppninnar myndi hins vegar þýða sæti í riðlakeppni Evrópudeildarinnar í vetur. Þá myndi FH spila að lágmarki sex leiki í riðlakeppninni sem lýkur í desember.

Líkt og greint var frá í Fréttablaðinu á dögunum þá bíður sigurliðsins í einvíginu að lágmarki 540 milljónir króna. Þegar hafa FH-ingar tryggt sér 112 milljónir vegna þátttöku sinnar í keppninni.

Leikur FH og Austria Vín verður í beinni útsendingu á Stöð 2 Sport. Þá verður leikurinn í beinni textalýsingu hér á Vísi.