Valdi barnið fram yfir liðið

Ekkert verður af því að knattspyrnumaðurinn Tom Ince gangi í raðir nýliða Cardiff í ensku úrvalsdeildinni.

Ince, sem er samningsbundinn Blackpool, var í viðræðum við velska liðið í vikunni. Flest benti til þess að hann yrði nýjasti liðsmaður þeirra enda höfðu félögin komist að samkomulagi um kaupverð. Svo kom babb í bátinn.

Cardiff segir ástæðu þess að Ince hafi ekki gengið í raðir félagsins þá að Ince hafi viljað vera áfram í Blackpool. Ince er nýbakaður faðir og vilji vera nærri barni sínu.

Fróðlegt verður að sjá hvort Ince verði áfram í röðum Blackpool eða rói á önnur mið.