Innlent

Heilsugæslan á heima hjá sveitarfélögunum

Ingveldur Geirsdóttir skrifar

Rekstur heilsugæslunnar á heima hjá sveitarfélögunum og getur það gert þjónustuna heildstæðari og betri. Þetta er mat oddvita Samfylkingarinnar í borgarstjórn. Hann er alfarið á móti einkavæðingu heilbrigðiskerfisins en heilbrigðisráðherra sagði í viðtali á Bylgjunni í morgun að aðrir  séu færari í að annast rekstur heilsugæslunnar en ríkið.

Kristján Þór Júlíusson heilbrigðisráðherra var gestur Sigurjóns M. Egilssonar í þættinum Sprengisandi á Bylgjunni í morgun. Þar  sagði  hann að það væri möguleiki að gefa kost á fleiri rekstrarformum heilsugæslunnar en að ríkið reki hana og tók þar sem dæmi rekstur sveitarfélaga á heilsugæslunni.

„Það er ýmislegt annað í boði heldur en það að ríkissjóðurinn, ráðuneytið, standi í rekstri. Ég er þeirrar skoðunar að við eigum frekar að horfa til þess að ráðuneytið sé stenfumótandi á grunni löggjafar sem alþingi hefur sett og síðan eru aðrir færari að annast um rekstur en ráðuneytin sjálf," sagði Kristján.

Túlka má orð Kristjáns Þórs á þann veg að honum hugnist einkavæðing heilbrigðiskerfisins, því er Dagur B. Eggertsson formaður borgarráðs og oddviti Samfylkingarinnar í Reykjavík alfarið á móti og sér ekki að peningar muni sparast á þann hátt.

„Þá held ég að það sé miklu skynsamlegra að horfa til hugmynda um að heilsugæslan flytjist yfir á ábyrgð sveitarfélaga. Það yrði þá liður í því að efla heilsugæslu fyrir alla með öruggum og góðum aðgangi og nægjanlegu fé til að standa undir góðri þjónustu," segir Dagur.

Dagur telur sveitarfélög vel í stakk búin til að reka heilsugæsluna og reynslan sýni að þjónustan geti orðið heildstæðari og betri fyrir sama fé.

„Reykjavík hefur lengi verið þeirrar skoðunar að heilsugæslan eigi heima hjá sveitarfélögunum og við höfum sent ráðuneytinu erindi og farið þess á leit að hefja viðræður um yfirtöku heilsugæslunnar því við sjáum heilsugæsluna sem snaran þátt í nærþjónustu við íbúana," segir Dagur.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.