Sigmundur Davíð lýsir áhyggjum af makríldeilunni

Sigmundur Davíð Gunnlaugsson forsætisráðherra gerði á fundum í Brussel í morgun, José Manuel Barroso, forseta framkvæmdastjórnar Evrópusambandsins, og Hermani van Rompuy, forseta leiðtogaráðs Evrópusambandsins grein fyrir afstöðu Íslands í makríldeilunni.

Sigmundur Davíð lýsti áhyggjum af þeirri umræðu sem verið hafi á vettvangi Evrópusambandsins um mögulegar viðskiptaþvinganir ESB gagnvart Íslandi í andstöðu við EES og Alþjóðaviðskiptastofnunina (WTO) og benti á að slíkar aðgerðir myndu ekki stuðla að lausn deilunnar.

Sigmundur Davíð segir að mjög ánægjulegt að forseti framkvæmdastjórnarinnar hafi að loknum umræðum þeirra tekið skýrt fram að höfuðmarkmið Evrópusambandsins væri að leysa deiluna með samningum og að mögulegar refsiaðgerðir sambandsins vegna deilunnar myndu alls ekki fara út fyrir ramma EES samningsins og WTO eða annarra alþjóðlegra skuldbindinga Evrópusambandsins.

„Þetta voru mjög uppbyggilegir og jákvæðir fundir. Möguleikar á sterkara samstarfi Íslands og ESB eru fjölbreyttir og við eigum að vinna sameiginlega að því að nýta þá óháð því hvernig sambandi þessara aðila er háttað að öðru leyti. Þar nefni ég t.d. sérstaklega Norðurslóðasamstarf, umhverfismál og orkunýtingu" sagði forsætisráðherra að loknum fundunum.