Katrín: Umgjörðin hérna er miklu stærri en hún var í Finnlandi

Katrín Jónsdóttir, fyrirliði íslenska kvennalandsliðsins, var að sjálfsögðu í skýjunum með árangur liðsins en hún er nú búin að leiða liðið sitt inn í átta liða úrslit á EM.

„Þetta var alveg magnað. Ég náði þessu ekki í gær og ég er aðeins að ná jarðsambandi aftur og átta sig á þessu. Þetta var stórkostlegt," segir Katrín um sigurinn á Hollandi á miðvikudagskvöldið.

Katrín hefur spilað bæði með Sif Atladóttur og Glódísi Perlu Viggósdóttur sér við hlið á mótinu.

„Það er fínt. Ég er búin að spila með báðum í ár og þær eru báðar frábærir leikmenn. Þær eru búnar að spila mjög vel í þessu móti. Það er frábært að við höfum svona margar góða leikmenn og getum dreift þessu. Sif var búin að vera svolítið tæp og þá stígur Glódís fram á meðan. Nú kom Sif aftur inn og átti frábæran leik á móti Hollandi," sagði Katrín.

„Við þurfum að setja okkur ný markmið. Þegar maður er búin að ná markmiðum sínum þá setur maður sér nýtt markmið. Það þýðir ekki bara að vera sáttur við þetta," segir Katrín. Hún sér mikinn mun á Evrópukeppninni á fjórum árum.

„Umgjörðin hérna er miklu stærri en hún var í Finnlandi. Ég er rosalega glöð að hafa haldið áfram. Þetta er búið að vera rosalega gaman og ég er búin að fá að reyna nýja hluti. Ég fór út og spilaði í sænsku deildinni. Ég er síðan búin að upplifa góð og svo minna góð móment með landsliðinu en það er frábært að fá að taka þátt í þessu," segir Katrín.

Hún vill þakka sérstaklega fyrir stuðninginn á mótinu. „Ég vil þakka tólfta manninum fyrir stuðninginn. Þau byrjuðu í upphitun og maður var strax komin með gæsahúð. Þau sungu og öskruðu úr sér lungun allan leikinn og eftir leikinn. Þetta gaf okkur þvlíkan kraft," segir Katrín.