Margir fá fótsveppi í sundi

Þegar sumarið er loks gengið í garð fjölmennir fólk í sundlaugar landsins. Það verður þó ekki aðeins tekið út með sældinni að spóka sig á sundlaugarbakkanum, en æ fleiri verða varir við að fá fótsveppi í sundi. Fótasveppur er sýking af völdum sveppa sem kallast dermatophytar.

Þetta bendir Sigríður Pálína Arnardóttir, lyfjafræðingur, á í grein sem hún sendi inn á vef Víkurfrétta í gær. „Fótsveppir eru algengur kvilli, sérstaklega hjá fullorðnu fólki en sjaldgæfari hjá börnum. Ég er alls ekki að gagnrýna sundlaugarnar eða aðbúnað þar, en það er staðreynd að sveppirnir þrífast best við rakar og heitar aðstæður. Þeta er algengt vandamál,“ sagði Sigríður í samtali við Vísi.

Sveppirnir eru smitandi og smitast hratt við bæði beina og óbeina snertingu. Einnig berst smit með vatni í heitum pottum og sundlaugum. Sigríður hvetur fólk til að þvo og þurrka fætur sína vel eftir íþróttaiðkun og sundferðir, það sé besta leiðin til að koma í veg fyrir smit.

Sigríður segir fætur oft gleymast þegar talað er um húðumhirðu, en góð umhirða fóta sé aftur á móti mjög mikilvæg. „Fólk virðist ekki vera nógu meðvitað um þetta, en ef ekkert er að gert þegar um fótsveppasýkingu er að ræða raskast bakteríuflóran og það getur komið bakteríusýking,“ segir hún og mælir með að fólk þvoi fæturna daglega með vatni og sápu og þurrki sér vel áður en farið er í sokka. Þá sé nauðsynlegt að nota bómullarsokka eða ullarsokka en ekki sokka úr gerviefnum þar sem þeir halda raka á fætinum.

Til eru nokkrar leiðir til að meðhöndla fótasveppasýkingu. „Ef grunur um svepp kemur upp getur fólk farið út í næsta apótek og fengið þar ráðgjöf og lyf í lausasölu sem hægt er að nota. Þá er mjög gott að púðra fæturnar reglulega til að hafa þá þurra,“ segir Sigríður. Ef sveppasýkingin er ekki meðhöndluð getur hún farið út í táneglur þá verður mun erfiðara að eiga við hana.

Á vefsíðunni áttavitinn.is er hægt að lesa meira um einkenni fótsveppasýkingar.