Skrýtið að fótboltabullur gegni pólitísku hlutverki

Fréttir bárust af því í gærkvöldi að leiðtogi uppreisnarmanna í Egyptalandi, Mohamed ElBaradei, hefði verið skipaður forsætisráðherra landsins en það var síðan dregið til baka. Formaður Félags múslima á Íslandi segir ljóst að samstaðan innan andstöðunnar sé lítil.

ElBaradei er 71 árs og er yfirmaður National Salvation Front, sem eru regnhlífarsamtök uppreisnarmanna í Egyptalandi. Hann var yfirmaður alþjóðasamtaka um kjarnorku og hlaut Friðarverðlaun Nóbels árið 2005, en hann var meðal þeirra sem hvöttu mest til mótmælanna sem urðu til þess að Mohammed Morsi forseti hrökklaðist frá völdum á miðvikudaginn.

Skipan hans var dregin til baka í gærkvöldi vegna andstöðu frá Al-Nour samtökunum, sem eru mun öfgafyllri en múslimska Bræðralagið og voru næststærsti flokkurinn í síðustu kosningum, að sögn Sverris Agnarssonar, formanns Félags múslima á Íslandi.

„Þetta sýnir bara að samstaðan milli andstöðunnar er ákaflega léleg og með tímanum finnst mér þetta meira farið að líta út eins og samsæri milli hersins og ákveðinna afla innan stjórnarandstöðunnar," segir hann.

Hann telur breytingar í loftinu.

„Mér sýnist það að margir af þeim sem voru með á þessum fundi sem kom Morsi frá hafi aldrei ætlað sér að koma honum frá heldur knýja fram nýjar kosningar og þetta lið virðist vera að bakka með sínar skoðanir því fjöldinn á mótmælafundum Bræðralagsins núna er miklu meiri en var á Tahrir torgi fyrsta júní."

Mótmælin snúast um pólitík en borið hefur á nokkurs konar karnivalstemmningu og mikið hefur verið um kynferðisofbeldi á götum úti.

„Kynferðisofbeldið hefur verið á Tahrir torgi og þar eru náttúrulega þessir borguðu glæponar eða fótboltabullur gömlu stjórnarinnar. Það er dálítið skrýtið í Egyptalandi að fótboltabullurnar hafa gegnt pólitísku hlutverki í mótmælum."

Sverrir segist óttast mest að Bræðralag múslima verði þvingað neðanjarðar.

„Þeir eru að fangelsa leiðtoga þeirra og þá fara þeir bara að vinna eins og þeir hafa alltaf gert, á bak við tjöldin, neðanjarðar og þá er hætt við að öfgaöflin nái yfirhöndinni. Núna eru margir ungir og tiltölulega frjálslyndir menn sem hafa náð áhrifum í Bræðralaginu. Egypska þjóðin skaltu muna, 75% hennar er 27 ára og yngri,“ segir hann að lokum.