Reykvíkingar flýja til útlanda

Allt lítur út fyrir að vætutíð verði á suðvestanverðu landinu fram yfir miðjan júlí. Margir eru búnir að fá nóg af ótíðinni og samkvæmt ferðaskrifstofunum bóka landsmenn ferðir til sólarlanda með engum fyrirvara.

„Það verður votviðrasamt hérna á vestanverðu landinu, aftur á móti fyrir norðan og austan veður bjart og hlýtt og allt að því 22 til 23 stiga hiti. Svo þegar nær dregur helginni þá kólnar þar," segir Björn Sævar Einarsson veðurfræðingur á Veðurstofu Íslands.

Rigningin heldur áfram fram yfir næstu helgi sunnan- og vestanlands og á sunnudaginn fer líka að rigna á Austurlandi.

Björn Sævar að lægð á eftir lægð séu á leiðinni hingað, eins langt og augað eygir. Og veðurfræðingurinn fær að heyra í óánægðum landsmönnum.

„Fólk er orðið dálítið langþreytt og farið að kvarta sem ég skil nú ekki alveg því eitt uppáhalds lag Íslendinga er „Mér finnst rigningin góð"," segir Björn Sævar.

Það finnst ekki öllum rigningin góð sem má meðal annars sjá á 12% aukning í sölu sólarferða hjá  Ferðaskrifstofu Íslands miðað við sama tíma í fyrra. Sérstaklega er aukning í ferðalögum fjölskyldufólks. Hjá Heimsferðum er líka mikil eftirspurn eftir ferðum á sólarstrendur, þar kemur fólk inn af götunni og vill kaupa miða til sólarlanda eins fljótt og hægt er, helst daginn eftir.

Sólarströnd Reykvíkinga, í Nauthólsvík, er nánast tóm á meðan, þó nokkrir hafi notið sumarsins þar í dag.

„Þetta er náttúrulega búið að vera mjög mikið rigningar leiðindasumar. Það er mikill munur á þessu sumri og í fyrra. það var sérstaklega gott sumar í fyrra," segir Hafdís Hrund Gísladóttir rekstrarstjóri ylstrandarinnar í Nauhólsvík.