Forsetinn boðar til blaðamannafundar vegna veiðileyfagjaldsins

Ólafur Ragnar Grímsson, forseti Íslands, hefur boðað til blaðamannafundar klukkan 16.15 í dag vegna frumvarps sem miðar að lækkun veiðileyfagjalda sem samþykkt var í síðustu viku.

Ríflega 35 þúsund einstaklingar hafa skrifað undir áskorun um að forsetinn neiti að skrifa undir lögin. Þær hafa verið afhentar forsetanum.

Ólafur Ragnar hefur bæði fundað með Birgittu Jónsdóttur, þingmanni Pírata, sem og forsvarsmönnun undirskriftasöfnunarinnar.

Úr vöndu að ráða

Gunnar Helgi Kristinsson, prófessor í stjórnmálafræði, sagðist í samtali við Vísi í síðustu viku eiga erfitt með að segja hvaða ákvörðun Ólafur Ragnar taki.

"Miðað við það hvernig Ólafur hefur hagað gjörðum sínum og ummælum í fortíðinni mætti ætla að hann muni synja þessu lagafrumvarpi um undirskrift, það er að segja, ef forsendurnar eru: 35 þúsund undirskriftir gegn lögunum liggja fyrir, 70 prósent þjóðarinnar eru á móti því að lækka auðlindagjaldið, og fyrri ummæli hans sjálfs skipta þarna líka verulegu máli; um þjóðaratkvæðagreiðslur almennt séð, hann hefur lýst því þannig að hann sé eiginlega verkfæri svona undirskriftasafnana við að framkalla þjóðaratkvæðagreiðslur og hann hefur líka lýst því yfir að veiðileyfakerfið henti sérstaklega vel til þjóðaratkvæðagreiðslu. Með alla þessa hluti í huga þá myndi maður ætla að það lægi nokkuð beint við að hann myndi neita að skrifa undir," sagði Gunnar Helgi.

Málið ekki einfalt

En málið er alls ekki svona einfalt, eins og Gunnar Helgi bendir á: „Á móti kemur að Ólafur Ragnar virðist hafa verið velviljaður þessari stjórnarmyndun, verið í tengslum við þá stjórnmálaforingja sem að henni komu og af þeim sökum telja ýmsir ástæðu til að ætla að hann myndi gjarnan vilja veigra sér við að synja þessu. Þá er spurning hvort hann finni einhvern flöt á því, ef rétt er. Þetta vald sem hann hefur til að synja um undirskrift er hreint geðþóttavald. Þannig að hann þarf í sjálfu sér ekki að búa til merkilegan rökstuðning. En það vill þannig til að hann er flinkur í því að búa til rökstuðning fyrir sínum ákvörðunum – eftir á.“