Yfirmaður íþróttamála hjá Bremen staðfestir áhuga á Alfreði

Fréttir bárust í gær frá Þýskalandi að úrvalsdeildarliðið Werder Bremen hefði áhuga á að fá Alfreð Finnbogason til liðins en það hefur nú verið staðfest af þýska félaginu.

Alfreð leikur með hollenska liðinu Heerenveen og stóð sig einstaklega vel á síðasta tímabili en hann var einn heitasti framherjinn í Evrópu.

,,Alfreð er mjög góður leikmaður og við höfum  alltaf áhuga á slíkum hæfileikum. Það er samt sem áður ókostur að leikmaðurinn er á langtíma samningi og því verður erfitt að fá hann til okkar,“ sagði Thomas Eichin, yfirmaður íþróttamála hjá Werder Bremen.

Alfreð er með samning við Heerenveen til ársins 2015.