Gagnrýnir Orkuveituna fyrir brennisteinsmengun nærri Waldorfskólanum

„Þetta varðar almannahagsmuni,“ segir Gunnar I. Birgisson, bæjarfulltrúi Sjálfstæðiflokksins í Kópavogi.

Hann bókaði sérstaklega á fundi framkvæmdaráðs í dag að mengun  í Lækjarbotnum frá Hellisheiðarvirkjun Orkuveitunnar, fari yfir viðmiðunarmörk, „sem er óásættanlegt,“ eins og segir í bókuninni sem Ómar Stefánsson, bæjarfulltrúui Framsóknarflokksins lagði fram með Gunnari í dag.

Bókunin kemur í kjölfar framlagningu minnisblaðs deildarstjóra eignadeildar Kópavogsbæjar þar sem gerð er grein fyrir nauðsynlegum endurbótum skólahúsnæðis Waldorfskólans í Lækjarbotnum, sem þurfa að koma til framkvæmda á þessu ári og næstu árum.

Gunnar gagnrýnir Orkuveitu Reykjavíkur harkalega vegna málsins, og segir að bæjaryfirvöld hafi þrýst á Orkuveituna fyrir nokkrum árum að hreinsa gufuna frá Hellisheiðavirkjun betur þannig að brennisteinsmengunin fari ekki yfir lögbundin mörk, eins og hefur gerst í gegnum tíðina. Þá stendur til að herða löggjöf um loftmengun en þau lög taka gildi næstu áramót.

„Orkuveitan getur ekki hummað þetta lengur af sér,“ segir Gunnar og bætir við: „Það er algjölega óþolandi að Orkuveitan geri ekkert í þessu.“

Bæjarfulltrúarnir segja svo í lok bókunarinnar að það sé full ástæða til að krefjast þess að Orkuveitan bæti úr þessu vandamáli strax.

Ekki náðist í umhverfisstjóra Orkuveitu Reykjavíkur við vinnslu fréttarinnar.