Umfjöllun og viðtöl: FH - Keflavík 3-2

FH er komið í 16 liða úrslit Borgunarbikars karla eftir 3-2 sigur á Keflavík á heimavelli sínum í kvöld. Staðan í hálfleik var 1-1.

Atli Viðar Björnsson kom FH í tvígang yfir en í milli tíðinni jafnaði Haraldur Freyr Guðmundsson metin, rétt fyrir hálfleik.

Fyrri hálfleikur var mjög hægur og lítið um færi. Keflavík var sterkari aðilinn áður en FH komst yfir en FH hafði átt ágætan kafla áður en Keflavík jafnaði. Því má segja að bæði mörk fyrri hálfleiks hafi verið skoruð gegn gangi leiksins.

Það tók FH aðeins fimm mínútur að skora í seinni hálfleik. Liðið keyrði upp hraðann í upphafi seinni hálfleiks og náði að láta boltann ganga á milli kanta sem hafði ekki gerst í fyrri hálfleik.

Þrátt fyrir hraðari leik í seinni hálfleik óð FH ekki í færum en var engu að síður sterkari aðilinn í leiknum og sótti mikið.

Keflavík sem lék ágætlega í fyrri hálfleik fékk úr litlu að moða í seinni hálfleik og var heppið að lenda ekki manni færri þegar markvörður liðsins, David Preece, fékk aðeins gult spjald fyrir að taka Atla Viðar Björnsson niður rétt utan vítateigs, sem aftasti maður.

Varamaðurinn Kristján Gauti Emilsson refsaði Keflavík með góðu marki á 90. mínútu. Keflvíkingar höfðu fært lið sitt framarlega í leit að jöfnunarmarki og Kristján komst auðveldlega inn fyrir vörnina og tryggði FH sigurinn.

Keflavík minnkaði muninn með síðustu spyrnu leiksins þar sem Magnús Þór Magnússon náði að pota boltanum yfir línuna en það var of lítið og of seint og FH komið áfram.

„Við erum komnir áfram og erum í pottinum þegar það er dregið og erum ánægðir með það,“ sagði hógvær Atli Viðar Björnsson markaskorari FH inntur eftir fyrstu viðbrögðum eftir leikinn.

„Þetta var ekkert sérstakur leikur, sérstaklega ekki fyrri hálfleikurinn. Við vorum hægir og ekki sjálfum okkur líkir. Við fórum yfir nokkur atriði í hálfleik og ýmislegt sem við vildum bæta og ég held að það hafi gengið ágætlega.

„Við vorum ósáttir við við lágt tempó í fyrri hálfleik og við vildum pikka upp tempóið og ég held að það hafi gengið ágætlega.



„Það gekk vel í dag. Það höfðu komið nokkrir leikir á undan sem ég hafði ekki náð að skora í en þetta gekk í dag og vonandi heldur það áfram. Ég held að ég hafi verið hægur eins og aðrir, sérstaklega í fyrri hálfleik.

„Við fáum mark fljótt í seinni hálfleik sem hjálpaði okkur mjög mikið,“ sagði Atli Viðar sem vill sækja Magna frá Grenivík heim í næstu umferð.

„Ég veit að félagar mínir verða ekkert ánægðir með að ég segi þetta en mig langar að fara til Grenivíkur. Ég á marga góða vini þar sem mig langar að heilsa upp á. Annars myndi ég vilja fá heimaleik.

„Mér fannst þessi leikur þokkalega vel spilaður af okkar hálfu. Við fáum á okkur ódýrt mark í fyrri hálfleik en mér fannst við töluvert sterkari aðilinn framað því að þeir skoruðu og eftir að þeir skoruðu,“ sagði Haraldur Freyr Guðmundsson fyrirliði Keflavíkur sem skoraði fyrra mark liðsins.

„Við náum að jafna og förum með 1-1 stöðu inn í hálfleik og við vorum staðráðnir í að gera betur í seinni hálfleik en við fáum á okkur enn og aftur mark úr föstu leikatriði snemma í byrjun seinni hálfleiks og það verður erfitt. Leikurinn var heilt yfir í járnum og þetta hefði getað dottið beggja megin.

„Það er alltaf fúlt að tapa fótboltleikjum og núna erum við úr leik í bikarkeppninni. Þá er það gamla klysjan að einbeita sér að deildinni.

„Þó menn geti talað um að það komi maður í manns stað þá vantaði klárlega þrjá sterka pósta í lið FH í dag og það að mínu mati veikir þá varnarlega og það var tækifæri til að vinna FH í dag í Kaplakrika.

„Það er eins og þetta virki eins og einhver vél hjá þeim. Það skiptir ekki máli hver kemur inn, þetta malar eins og vél og við vorum ekki nógu góðir til að vinna hér í dag.

„Í grunninn þá hlupum við og djöfluðumst og það skilaði sér í því að við fengum ágætis pláss inni á vellinum. Við áttum ágætis krossa og áttum fínan leik að mínu mati,“ sagði Haraldur að lokum.