Innlent

Segir stjórnarsáttmálann óraunhæfan

Jón Hákon Halldórsson skrifar
Guðmundur Steingrímsson óskar nýju ríkisstjórninni velfarnaðar, en finnst stjórnarsáttmálinn óraunhæfur.
Guðmundur Steingrímsson óskar nýju ríkisstjórninni velfarnaðar, en finnst stjórnarsáttmálinn óraunhæfur. Mynd/ Sigurjón Ólason.

„Ég vil óska væntanlegri ríkisstjórn velfarnaðar í krefjandi störfum,“ segir Guðmundur Steingrímsson, formaður Bjartrar framtíðar. Hann segir að Björt framtíð muni reyna að verða að góðu liði til að framfylgja þeim þáttum í stjórnarsáttmálanum sem skipti máli. Hann sé til dæmis ánægður með áherslu á nýsköpun, skapandi greinar og uppbyggingu í atvinnulífi. Hann sé líka ánægður með áherslu á fjölbreytni í skólakerfi og fyrirhugaða vinnu gegn brottfalli. „Við munum að sjálfsögðu reyna að koma að gagni í öllum þessum verkefnum og stunda uppbyggilega gagnrýni og skýra,“ segir hann.

Guðmundur segir þó ljóst að stjórnarsáttmálinn sé ekki raunhæfur. „Það er margt sem er óljóst í þessu og við setjum stór spurningamerki við,“ segir hann. Hann bendir á sem dæmi að ríkisstjórnin ætli sér að ná efnahagslegum stöðugleika með krónuna sem gjaldmiðil og án hafta. „Þetta verður óhemju krefjandi verkefni og maður á nú eftir að sjá þetta gerast. „Síðan mun reyna mjög á fyrstu fjárlögin miðað við skattalækkunaráformin,“ segir Guðmundur Steingrímsson. Það sé ekkert sem gefi til kynna að það eigi að skera niður. „Út frá þessari skattastefnu mun reyna mjög á fjárlagavinnuna. Fyrstu fjárlög þessarar ríkisstjórnar verða vægast sagt mjög áhugaverð,“ segir Guðmundur. 

„Þessi ríkisstjórn skilgreinir heimilin mjög þröngt, en hún skilgreinir þau aðallega út frá lántakendum,“ segir Guðmundur. Björt framtíð hafi bent á að mörg heimili hafi aðra hagsmuni en lántakendur. „Það eru heimili sem skulda tiltölulega lítið eða heimili sem eru á leigumarkaði. Þannig að mér finnst mjög stórum réttlætis- og sanngirnisspurningum ósvarað varðandi það hvernig ríkisstjórnin ætlar að hjálpa heimilinum,“ segir Guðmundur. 

Loks segist Guðmundur telja að það sé mjög gagnrýnisvert að setja umhverfisráðuneytið undir sama hatt og sjávarútvegs- og landbúnaðarráðuneytið. Umhverfismál séu vaxandi málaflokkar og mjög mikilvægur.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.