Umfjöllun, viðtöl og einkunnir: KR - Þór 3-0 | Gary Martin kominn í gang

KR-ingar héldu sigurgöngu sinni áfram á KR-vellinum í kvöld þegar liðið vann þægilegan 3-0 sigur á Þór í 3. umferð Pepsi-deild karla í fótbolta. KR er búið að vinna fyrstu þrjá leiki sína á Íslandsmótinu en nýliðar Þórsara eru stigalausir eftir þrjá leiki.

Umfjöllun og viðtöl: KR- þór 3 - 0 | Gary Martin kominn í gang

 

Gary Martin átti stórleik fyrir KR-inga þegar þeir unnu þægilegan 3-0 sigur á Þór í Frostaskjólinu í kvöld. Martin skoraði annað mark þeirra röndóttu í kvöld og lagði það þriðja upp.

 

Leikurinn fór fjörlega af stað en fyrsta markið kom eftir aðeins sjö mínútur . Atli Sigurjónsson tók hornspyrnu sem hafnaði á kollinum á Baldri Sigurðssyni sem skoraði ágætis mark.

 

Eftir markið virtust heimamenn eflast töluvert og áttu góðar sóknir sem skiluðu þó litlu. Þórsarar áttu ágætis spretti í hálfleiknum en gekk illa að skapa sér færi Vindurinn gerði mönnum erfitt fyrir og margar sendingar fóru forgörðum.

Heimamenn komu grimmir til leiks í seinni hálfleik og stjórnuðu leiknum nánast allan hálfleikinn.  Á 53. mínútu átti Óskar Örn fína sendingu á Emil Atlason sem tók hann snyrtilega á kassann, lagði boltann á Martin sem smellti honum neðst í hornið. KR-ingar komnir í 2-0.

 

Þórsarar áttu erfitt uppdráttar þegar þarna var komið við sögu. KR-ingar gengu á lagið og kom Martin aftur við sögu. Hann átti góða stungusendingu inn fyrir vörn Þórs á Ólafsvíkinginn Þorstein Má Ragnarsson sem skoraði þriðja og síðasta mark Vesturbæinga.

 

KR-ingar halda áfram á sigurbraut og eru með níu stig eftir þrjá leiki. Þór er enn stigalaust eftir fyrstu þrjár umferðir.

Rúnar Kristinsson, þjálfari KR-inga var að vonum ánægður með sína menn í kvöld en vildi ekki ganga svo langt að skrá þetta sem öruggan sigur.

 

„Þetta var ekki öruggur sigur hjá okkur í kvöld. Við skoruðum snemma í leiknum og þá hélt ég að við myndum vera einbeittir og bæta við okkur fyrr, en við gerðum það ekki,“ sagði Rúnar og bætti við:

 

„Við áttum margar slakar sendingar og hleyptum þeim inn í leikinn. Full mikil örvænting og stress í okkar leik þótt við værum einu marki yfir.“

 

„Það er mikill léttir fyrir okkur að fá Gary í gang og svo skoraði Þorsteinn líka. Það er mikið ánægjuefni að margir séu að skora fyrir okkur.“

 

„Það vilja allir þjálfarar vinna þá leiki sem þeir fara í og við erum búnir að vera heppnir að fá sigur í þeim öllum. En þetta er langt mót og við eigum erfiðan leik út í Eyjum í næstu umferð,“ sagði Rúnar að lokum.

„Ég vill meina að við höfum verið inni í leiknum í stöðunni 1-0 og héldum það út fram í hálfleik. En seinna markið gerir út um leikinn,“ sagði Páll Viðar Gíslason, þjálfari Þórs, í leikslok.

 

„Við verðum að skipuleggja okkur betur í vörninni og við ætlum ekkert að gefast upp. Við erum með fullt af hæfileikaríkum einstaklingum innan okkar raða. Við verðum einfaldlega að búa til þannig aðstæður að þeir njóti sín betur og þá spila þeir betur.“

 

„Sjálfstraustið er ekki mikið þegar lið tapa þremur fyrstu leikjunum en að sama skapi er það ekkert leyndarmál að við erum að fara í erfiðan pakka. En það er nóg eftir af mótinu og við eigum leik strax á mánudag og við verðum vonandi klárir í þann leik.“

 

„Mjög sterkt KR lið var skynsamara en við í dag og nýttu sér okkar mistök,“ sagði Páll Viðar að lokum.

„Þórsarar voru þéttir og vörðust vel en við vorum það líka og héldum hreinu og vorum beittir fram á við,“ sagði Jónas Guðni Sævarsson, miðjumaður KR.

 

„Þetta var aldrei í hættu hjá okkur og ég man ekki eftir færi hjá þeim.“

 

„Það er frábært að fá Gary og Þorstein inn í þetta.  Þeir eru farnir að skora sem eykur sjálfstraustið hjá okkur,“ sagði Keflvíkingurinn Jónas Guðni.