Baráttukona í bíó

Sérstök sýning á heimildarmyndinni Call Me Kuchu verður í Bíó Paradís í kvöld, en baráttukonan Kasha Jaqueline Nabagesera verður viðstödd sýninguna og svarar spurningum áhorfenda að henni lokinni.

Call Me Kuchu var sýnd á RIFF-kvikmyndahátíðinni í fyrra og fjallar um réttindabaráttu samkynhneigðra í Úganda og David Kato, fyrsta manninn sem kom opinberlega út úr skápnum þar í landi, en hann var myrtur árið 2011.

Nabagesera er í heimsókn hér á landi til að vekja athygli á málefnum samkynhneigðra og transfólks í heimalandi sínu Úganda, þar sem samkynhneigð er bönnuð með lögum.

Sýningin hefst klukkan 20 í kvöld og miðaverð er 750 krónur.