Staða Vítisengla og Útlaga aldrei verið veikari

Á blaðamannafundi sem lögreglan á höfuðborgarsvæðinu og á Suðurnesjum héldu nú síðdegis kom fram að staða Outlaws og Hells Angels hér á landi hafi aldrei verið eins veik og í dag.

Árið 2011 fór lögreglan í átak gegn skipulagðri glæpastarfsemi eftir að lögreglu barst upplýsingar um að breytingar í undirheimunum væru að eiga sér stað. Einn anginn af því hafi verið að vélhjólagengi væri að festa sig í sessi, einkum Hells Angels og Outlaws.

„Staðan er núna sú að við teljum að fyrirbyggjandi aðgerðir sem lögreglan hefur verið með, bæði í rannsóknum og aðgerðum á götunni, hafi skilað því að staða þessara tveggja klúbba hefur ekki verið eins veik og hún er í dag. Erlendir kollegar okkar vilja meina að Íslendingar geti hamlað starfsemi þeirra og komið í veg fyrir að þeir starfi hér á landi,“ sagði Karl Steinar Valsson, aðstoðaryfirlögregluþjónn, á fundinum.

Fækkun í klúbbum

Karl Steinar sagði að lögreglan hafi unnið markvisst við erlendum samstarfsmönnum sínum, og hafa beitt öllum leiðum til að koma í veg fyrir að þessir hópar festu rætur sínar hér á landi.

„Það sem við sjáum sem beinan árangur, er til dæmis að fækkun meðlima hefur verið áberandi í þessum tveimur klúbbum. Þeir eru með svo fáa meðlimi að þeir eru í vandræðum með að taka þátt,“ sagði hann. Lögreglan hafi komið í veg fyrir talsvert ofbeldi í aðgerðum sínum, síðustu tvö árin.

„Á tímabili beindist þessi athygli gegn okkur, þeir höfðu uppi hótanir gegn lögreglumönnum og fjölskyldum þeirra, en við komum í veg fyrir það með mjög sterku inngripi,“ sagði hann og nefndi í því sambandi húsleitir og handtökur. Í húsleitunum hafi gögn fundist sem bentu til að ráðast ætti gegn lögreglumönnum.

1200 daga í gæsluvarðhaldi

„Við höfum einnig komið í veg fyrir fullgildingu Outlaws. Í dag er Hells Angels með meðlimastöðu, en þeir hafa lent í vandræðum gegn móðurklúbbnum vegna þess að þeir þykja ekki standa sig nægilega vel í sinni starfsemi. Það sem við höfum gert og höfum lagt áherslu á er að miðla upplýsingum á milli embætta,“ sagði hann.

Á þessum tveimur árum hafa menn, sem eru grunaðir að tengjast skipulagðri glæpastarfsemi, setið í gæsluvarðhaldi í 1200 daga. „Það má segja að við höfum verið með 2 til 3 menn í gæsluvarðhaldi síðan við byrjuðum -  það segir svolítið um umfang brotanna.“

Í þessum aðgerðum hefur lögreglan lagt hald á meðal annars 11 virk skotvopn, 80 hnífa. „Því miður stöndum við frammi fyrir því að við þurfum í starfi lögreglu að fylgjast vel með þróun sem er að gerast í Evrópu. Við þurfum að horfa nákvæmlega á það sem er í gangi núna. Íslensk yfirvöld verða að vera á tánum ef þau ætla að ná árangri.“

Raunhæft markmið að útrýma vélhjólagengjum

Spurður hvort að hann sé bjartsýnn á að útrýma vélhjólagengjum alveg hér á landi sagði Karl Steinar: „Ég er vonbetri um það núna, en þegar við lögðum af stað í þetta verkefni. Það hefur engu landi tekist það. [...] Mér finnst þetta raunhæft markmið og mjög brýnt að stjórnvöldum beiti sér fyrir því að þetta takist.“

Lögreglan fékk í morgun 25 milljóna aukafjárveitingu frá ríkisstjórninni til að halda áfram að vinna gegn skipulagðri glæpastarfsemi.