47 eignir boðnar upp á Selfossi í dag

Framhaldsuppboð á 47 fasteignum fór fram hjá Sýslumanninum á Selfossi í dag.

Samtökin Almannavarnir fólksins í landinu sendu út fréttatilkynningu vegna þessa í gær. Í tilkynningunni segir að um „einhliða eignaupptöku“ sé að ræða af hálfu fjármálafyrirtækja.

Fréttastofa Vísis náði tali af Bjarna Bergmann Vilhjálmssyni hjá samtökunum sem hafði ýmislegt að athuga við framgang sýslumanns í málinu. „Það voru gerðar þarna allskonar athugasemdir sem hann kaus að hlusta ekki á. Hann var spurður meðal annars að því hvort hann hefði kynnt sér lögmæti krafna, og þá ákvað hann að fresta uppboðinu til klukkan níu um kvöldið. Svo bar gerðarþolinn fram sín mótmæli og við vorum að vonast til þess að hann [sýslumaður innsk. blm.] myndi vísa málinu til dóms.“ Að sögn Bjarna hafi sýslumaðurinn svo hætt við frestunina.

Aðspurður um hvers vegna sýslumaðurinn hefði átt að vísa málinu til dóms sagði Bjarni: „Af því að það komu fram mótmæli við kröfunni og af því að hann er ekki dómstóll og á ekki að taka neinar ákvarðanir þar sem hann er framkvæmdavald.“ Bjarni vísaði í því skyni til 73. gr. laga nr. 90/1991 um nauðungaruppboð. Bjarni hrósaði sýslumanni þó fyrir það að hafa klæðst einkennisbúningi við nauðungaruppboðið.

Inntur eftir viðbrögðum við athugasemdum samtakanna, segir Ólafur Helgi Kjartansson, sýslumaðurinn á Selfossi: „Ákvörðun sýslumanns snýr ekki að neinum efnisatriðum. Meintur ágreiningur í málinu snýr að atriðum sem ekki hafa fengið löglega niðurstöðu neinsstaðar.“ Þá sagði Ólafur að nauðungarsölubeiðnum væri ekki frestað vegna þess að efnislegur ágreiningur væri uppi í málinu heldur væru slík ágreiningsefni leyst fyrir dómstólum. Ólafur benti þó á að allar ákvarðanir sýslumanns, til dæmis um það hvort frestun á nauðungarsöluuppboði væri hafnað, mætti alltaf bera undir dómstóla.

Telur neytendarétt ekki virtan

Bjarni segir að réttaróvissa sé til staðar um það hvort heimilt sé að gera aðför að hinu veðsetta án undangengins dóms, jafnvel þó að í skuldaskjalinu kveðii sérstaklega á um að slík aðför sé heimil. „Ég er bæði búinn að tala við lögmenn frá Bretlandi og blaðamann frá Þýskalandi í gær. Það sem stendur upp úr er að það á ekki að taka eign af fólki nema með dómsúrskurði.“ Bjarni bætir svo við: „Við vitum það að bæði Hagsmunasamtök heimilanna og Verkalýðsfélagið á Akranesi eru með dómsmál vegna svona lána og það er réttaróvissa um það þangað til dómur er upp kveðinn í því. Þess vegna ætti að túlka það neytendum í vil.“

Sýslumaður segist fara að lögum

„Sú réttaróvissa hefur ekki komið fyrir dómstólana að mér vitandi,“ segir Ólafur. „Það liggur ekki fyrir að lög segi að það eigi að fresta vegna þessa og það er ekki fyrir hendi neinn dómur sem segir að það skuli fresta og bíða eftir niðurstöðu,“ segir Ólafur og bætir við: „Það liggur fyrir að um uppboðið er beðið á grundvelli lögformlegra gagna.“ Ólafur ítrekaði að það félli ekki í skaut sýslumanns að skera úr um efnisleg réttindi skuldara og kröfuhafa. „Ákvörðun sýslumanns snýr ekki að neinum efnisatriðum."