Stefán Karl, Sölvi og Kofi Annan

Ísland er fyrsta landið til þess að ganga formlega til liðs við alþjóðanefnd um nýja fíkniefnastefnu. Nefndina skipa meðal annars Kofi Annan auk fleiri þjóðhöfðingja sem stigið hafa fram og viðurkennt að stríð þeirra gagnvart fíkniefnaneyslu voru mistök.

Þetta kemur fram í tilkynningu sem Birgitta Jónsdóttir þingmaður sendi frá sér í morgun. Gunnar Smári Egilsson, Stefán Karl Stefánsson, Helga Sif Friðjónsdóttir og Sölvi Tryggvason ljá málstaðnum andlit sitt í íslenska hluta herferðarinnar sem hófst með birtingu meðfylgjandi myndbands í morgun.

Á heimasíðu átaksins kemur fram að Jimmy Carter, fyrrum forseti Bandaríkjanna, tónlistarfólkið Sting og Yoko Ono, Fernando Cardoso, fyrrum forseti Brasilíu og Richard Branson séu meðal stuðningsmanna verkefnisins. Viðurkenna þau að stríðið gegn fíkniefnum hafi mistekist.

Áhersla herferðarinnar er að koma heimildarmyndinni Breaking the Taboo í sýningu í sjónvarpi og þá helst á ríkisfjölmiðlum. Er Rúv hvatt til þess að sýna myndina en ekki þarf að greiða fyrir sýningarréttinn. Myndin hefur verið sýnd í Bíó Paradís í Reykjavík og verður sýnd í Sambíóinu á Akureyri um komandi helgi. Aðgangur er ókeypis.

Þingsályktunartillaga um að skapa heildstæða stefnu um samþætt úrræði til að draga úr eftirspurn eftir fíkniefnum var samþykkt á Alþingi í gær. Í ályktuninni segir:

„Misnotkun ávana- og fíkniefna er heilbrigðisvandamál sem meðhöndla þarf sem slíkt. Með því að nálgast vandann með heilstæðum og samþættum úrræðum til að draga úr eftirspurn fíkniefna hefur „portúgalska leiðin" leitt til þess að dregið hefur úr misnotkun fíkniefna og kostnaði fyrir samfélagið."