Þór Saari leggur fram vantrauststillögu að nýju

Þór Saari lagði í dag fram vantrauststillögu á ríkisstjórnina. Hann hefur jafnframt óskað eftir því við Ástu Ragnheiði Jóhannesdóttur, forseta Alþingis, að tillagan verði tekin á dagskrá þingsins á morgun.

Í greinargerð með vantrauststillögunni segir Þór að ríkisstjórnin sitji í umboði meiri hluta þingsins, en þingið geti ekki afgreitt frumvarp til stjórnarskipunarlaga byggt á þeim drögum sem samþykkt var að leggja til grundvallar nýrri stjórnarskrá og samþykkt voru með yfirgnæfandi meiri hluta í þjóðaratkvæðagreiðslu 20. október 2012.

„Lýðræðisumbætur sem lofað var í aðdraganda kosninga hafa ekki séð dagsins ljós og enn er við lýði ójafn kosningarréttur eftir landshlutum, ójafnrétti í fjármálum stjórnmálaflokka og skortur á persónukjöri og beinu lýðræði," segir Þór í greinargerð með tillögunni.

Þegar Þór lagði fram vantrauststillögu fyrir um hálfum mánuði var útlit fyrir að hún yrði felld á jöfnu. Þó lá ekkert fyrir um það og það mun heldur ekki liggja fyrir nú fyrr en að atkvæði verða greidd.