Hlýnar og slær á skafrenning í kvöld

Vonskuveður er á Suðurlandi og víðast hvar ekki ferðaveður. Á láglendi suðvestanlands hlýnar upp undir frostmark í kvöld og slær verulega á skafrenning. Þetta kemur fram í tilkynningu frá Vegagerðinni.

Austan Reykjavíkur á Mosfellsheiði og eins Hellisheiði og í Þrengslum verður austanstormur, skafrenningur og lítið skyggni allt til morguns. Hviður verða á Kjalarnesi 30-40 m/s fram yfir miðnætti.

Undir Eyjafjöllum verður hríð, lítið skyggni og stormur með hviðum meira og minna til morguns og snarpar hviður einnig í Öræfasveit. Á Vesturlandi og Vestfjörðum lagast markvert í kvöld, rofar til en áfram hvasst og skafrenningur. Norðan- og austanlands fer einnig hægt skánandi, einkum í nótt samfara heldur minnandi veðurhæð þar.

Færð og aðstæður

Vonskuveður er á Suðurlandi og víðast hvar ekki ferðaveður. Þæfingsfærð og stórhríð er á Reynisfjall.

Það eru hálkublettir og skafrenningur á Hellisheiði, í Þrengslum og á Sandskeiði. Búið er að opna veginn um Kjalanes en þar eru hálkublettir og óveður. Á höfuðborgarsvæðinu er víðast hvar mjög blint og hálka. Hálka og skafrenningur er á Reykjanesbraut og á Suðurnesjum þó er en flughálka frá Keflavík út í Sandgerði og Garð.

Vonskuveður er víða á Vesturlandi. Stórhríð er víða á Snæfellsnesi. Fróðárheiði er ófær. Þungfært er milli Búða og Hellna en ófært frá Hellissandi að Grundarfirði. Þungfært er einnig á Svínadal og stórhríð á Skarðsströnd.

Á Vestfjörðum er ekkert ferðaveður, fjallvegir eru flestir ófærir og einnig er víða slæm færð í byggð.

Mjög slæmt veður er einnig á Norðurlandi. Stórhríð í Húnavatnssýslum og á Þverárfjalli og eins á Tröllaskaga. Ófært er á Siglufjarðarvegi og á Öxnadalsheið einig til Grenivíkur og á Víkurskarði. Búið er að opna vegin í Héðinsfirði einnig vegin á milli Ólafsfjarðar og Dalvíkur en þar er snjóþekja og éljagangur. Þæfingsfærð og stórhríð er í Ljósavatnsskarði en snjóþekja og stórhríð á Tjörnesi og óveður áfram þaðan austur á Raufarhöfn. Þæfingsfærð og skafrenningur er á Hófaskarði.

Það er ófært á Möðrudalsöræfum, Fjarðarheiði, Vopnafjarðarheiði og Vatnsskarði eystra. Stórhríð er á Jökuldal og þæfingur. Þungfært og skafrenningur er á Oddsskarði. Versnandi veður er með austurströndinni.

Óveður er í Öræfum og alls ekki ferðaveður, grjótfok og mikið um rúðubrot á bílum sem þar hafa verið á ferð.