Unnið að því að hreinsa götur borgarinnar

„Ástandið að verða nokkuð gott, tækin eru farin að komast inn í hverfin til vinnu í húsagötum en þar er ástandið erfitt vegna ófærðar og bíla sem eru fyrir," segir Guðjóna Björk Sigurðardóttir, skrifstofustjóri þjónustu og reksturs borgarlandsins hjá Reykjavíkurborg í tilkynningu frá borginni.

Unnið var til klukkan ellefu í gærkvöldi en þá héldu 2 bílar áfram að skafa göturnar til klukkan fjögur í nótt. Svo bættist við mannskapur á tækjum og við tók áframhaldandi ruðningur, söltun og söndun á götum, stofnanalóðum, biðstöðvum strætó, sem og á göngu- og hjólaleiðum.

Allur tiltækur mannskapur er við þessi verkefni. Þar á meðal dráttarvélar borgarinnar, sem eru 10 talsins, auk 35 verktaka á gröfum og ruðningstækjum. Allir 11 flokkabílar hverfastöðvanna eru úti við störf fullmannaðir og vinna einkum við hreinsun á tröppum og biðskýlum. Unnið verður af krafti í allan dag.

Áhersla er lögð á staði þar sem færðin er þyngst svo sem í efri byggðum og í Skerjafirði þar sem skóf mikið frá flugvelli .

Ábendingar um snjóruðning er gott að setja inn á ábendingavefinn www.reykjavik.is/borgarland og einnig kemur símaver ábendingum áleiðis.