Góðgerðardagur haldinn í MK

Nemendur Menntaskólans í Kópavogi standa fyrir skemmtidagskrá á morgun milli 12 og 17 undir nafninu Góðgerðardagur MK.

Vigdís Lilja Guðmundsdóttir, einn skipuleggjenda, segir allan ágóða af skemmtuninni renna til Einstakra barna, samtaka fyrir fjölskyldur barna með sjaldgæfa og langvarandi sjúkdóma, og Liðsmenn Jerico, samtaka foreldra eineltisbarna og uppkominna þolenda.

„Þarna verða frábærir tónlistarmenn eins og Þórunn Antonía, Heiða Ólafs og Hreimur úr Landi og sonum," segir Vigdís og bætir því við að dagskráin fari fram á tveimur stöðum innan skólans.

„Söngvaborg verður á staðnum fyrir litlu börnin og svo er tónleikadagskrá fyrir þá eldri. Það verður þarna andlitsmálning og ís, og svo verðum við með DVD-disk Einars Mikaels töframanns til sölu og rennur ágóðinn af honum líka til samtakanna. Það kostar þúsund krónur inn, fimm hundruð fyrir sex til tólf ára og frítt inn fyrir yngstu börnin."