Ingó hættur í meðferð við hvítblæði - Langar að taka myndir af Kötlugosi

„Það var dálítið „heavy" að fá fréttirnar," segir ljósmyndarinn Ingólfur Júlíusson sem hefur barist við hvítblæði síðustu mánuði. Í síðustu viku tilkynnti Ingó, eins og hann er að jafnan kallaður, á facebook að ekki hefði tekist að lækna hvítblæðið og því hafi meðferð verið hætt. Ingólfur hefur því fengið úrskurð frá lækni um að hann eigi nokkra mánuði eftir ólifaða.

Ingó segist þó ekki vera búinn að afskrifa sig sjálfan, „ég er pollrólegur yfir þessu og eyði núna bara tíma með fjölskyldunni," bætir hann við. Lesendur kannast kannski helst við Ingó í gegnum myndir sem hann hefur tekið fyrir fjölmiðla í áraraðir. Síðasta myndin sem hann tók var af Baldri Ragnarssyni, meðlimi Skálmaldar, þar sem rætt var við tónlistarmanninn um Mottumars.

Ingó segist ekki hafa mikla starfsorku, því muni lesendur dagblaða líklega ekki sjá mikið fleiri myndir eftir hann. Spurður um draumaljósmyndaverkefnið svarar Ingó sposkur: „Ég væri til í að mynda Kötlugosið."

Ingó er bjartsýnn og segir það tímasóun að leggjast í þunglyndi og volæði. „Lífið er allt of stutt fyrir slíkt vesen," segir Ingó sem segist upplifa lífið mun sterkar nú, þegar dauðinn virðist svo nálægur. Hann segist hafa fundið fyrir öfund í garð aldraðs fólks, „það er dálítið sérstök tilfinning," lýsir Ingó. Hann bætir við: „Fólk ætti að hafa það í huga að það á að gera það sem það vill. Lífið er of stutt. Gætið þess að vaða ekki áfram í einhverju tilgangsleysi, enda veit maður ekki hvenær síðasta mínútan rennur upp."

Ingó segist raunar heppinn hvað tímann varðar, „ég veit allavega nokkurnveginn hvenær ég renn út," segir hann sposkur.

Tónleikar til styrktar Ingólfi verða haldnir í Norðurljósum í Hörpu 28. febrúar. Allir sem koma fram á tónleikunum gefa vinnu sína og þeirra á meðal eru Ari Eldjárn, Hörður Torfason, Dimma, KK og Q4U, sem Ingólfur hefur spilað með. Aðgangseyrir er kr. 2.500 krónur. Miðasala er í Hörpu og á Midi.is.

Þeir sem ekki komast á tónleikana geta lagt inn peninga á eftirfarandi reikning: 0319-26-002052. Kennitala: 190671-2249.