Taka upp kvikmynd á átta dögum

Tökur eru hafnar á kvikmyndinni Fiskar á þurru landi í stúdíói Sagafilm við Laugaveg en myndin verður sýnd í tveimur hlutum á RÚV um páskana. Það eru ánægjulegar fréttir að RÚV hyggst taka virkan þátt í kvikmyndavorinu með því að bjóða upp á frumsýningu á glænýju íslensku efni um páskana. Fá fordæmi eru fyrir því og er þetta vonandi merki um það sem koma skal í ljósi aukinnar fjárveitingar til kvikmyndagerðar, segir meðal annars í fréttatilkynningu um verkefnið.

Fiskar á þurru landi gerist á gistiheimili í litlu plássi út á landi en myndin er byggð á leikriti eftir Árna Ibsen. Handritið skrifuðu þeir Óskar Jónasson og Sjón en Óskar er enn fremur leikstjóri myndarinnar. Óskar er Íslendingum góðkunnur og hefur meðal annars leikstýrt sjónvarpsþáttaseríunum Pressa, Svartir englar og Stelpurnar.

Búið er að byggja gistiheimilið í heild sinni í stúdíói Sagafilm. Það er gríðarlega mikil vinna sem liggur á bak við þessa metnaðarfullu sviðsmynd en upptökur á sjónvarpsmyndinni taka aðeins átta daga sem er talsvert styttra tökutímabil en gerist og gengur.

Fjórir leikarar gæða persónur í Fiskar á þurru landi lífi. Það eru þau Ólafía Hrönn Jónsdóttir, Hilmar Guðjónsson, Sara Margrét Nordahl og Davíð Guðbrandsson.

Myndin er framleidd af Sagafilm, stærsta framleiðslufyrirtæki landsins á sviði sjónvarpsþáttagerðar, sjónvarpsauglýsinga, kvikmyndagerðar og viðburða. Sagafilm hefur framleitt margar verðlaunuðustu sjónvarpsseríur landsins eins og Vaktarseríurnar, Pressu, Rétt, Ástríði og Svarta engla sem og kvikmyndirnar Bjarnfreðarson og Köld slóð.

Sagafilm á Facebook.