Nauðsynlegt fyrir Samfylkinguna að miðla framtíðarsýn sinni

„Ég tel að þetta sé skýrt ákall til Samfylkingarinnar um að horfa til framtíðar,"segir Katrín Júlíusdóttir, fjármálaráðherra og þingmaður Samfylkingarinnar.

Samkvæmt könnun sem framkvæmd var á miðvikudag af 365 fyrir Stöð 2 og Fréttablaðið hefur fylgi Samfylkingarinnar hrunið á síðustu vikum. Fylgi flokksins mælist nú 12 prósent en það var 20 prósent við síðustu könnun.

Katrín, sem nú situr landsfund Samfylkingarinnar, segir að niðurstöðurnar séu ekki óvæntar. Þvert á móti séu þær áminning um þau erfiðu verkefni sem núverandi ríkisstjórn hefur þurft að takast á við.

„Við höfum þurft að takast á við mörg þrælerfið verkefni á þessu kjörtímabili," segir Katrín. „Þessi erfiðu verkefni hafa haldið aftur af okkur þegar kemur að því að ræða framtíðina."

Þannig sé nauðsynlegt fyrir Samfylkinguna að bíta í skjaldarrendurnar og horfa til framtíðar.

„Við erum hér með öflugan landsfund og niðurstöðurnar héðan munu skila góðu fóðri í umræðuna fyrir kosningar," segir Katrín að lokum.

Ný aðferðarfræði var notuð við útreikning á könnuninni. Tilgangurinn er að leiðrétta þær skekkjur sem fjöldi óákveðinna veldur. Alls var hringt í 1.382 einstaklinga, eða þar til náðist í 800 manns samkvæmt lagskiptu úrtaki. Vert er að minnast á að 45 prósent neituðu að gefa upp afstöðu sína til stjórnmálaflokka.