Hafa fengið sendar tillögur að enskum texta

„Ég hef þurft að berjast fyrir hárinu," segir söngvarinn Eyþór Ingi Gunnlaugsson sem mun syngja framlag Íslands í Söngvakeppni evrópskra sjónvarpsstöðva í ár.

Eyþór Ingi var gestur í Kastljósi í kvöld ásamt laga- og textahöfundunum Pétri Erni Guðmundssyni og Örlygi Smára. Eyþór Ingi segir ekki koma til greina að fara í klippingu fyrir lokakeppnina í Malmö í maí.

„Nei, ég ætla ekki í klippingu. Það kemur ekki til greina," sagði Eyþór Ingi í viðtalinu við Kastljós. Hann segist hafa þurft að berjast fyrir hári sínu í leiksýningum í gegnum tíðina. Hann ætlar samt að vera flottur á sviðinu í Svíþjóð.

„Ég er til í að raka skeggið, breyta nefinu og skera af mér bumbuna," sagði Eyþór léttur en sagði ljóst að síðu lokkarnir yrðu á sínum stað.

Pétur Örn og Örlygur Smári sögðu ekki ákveðið hvort laginu „Ég á líf" yrði snúið yfir á ensku fyrir lokakeppnina eða ekki.

„Það verður bara að koma í ljós," sögðu þeir félagar sem hafa fengið fimm tillögur að enskum texta sendar frá utanaðkomandi aðilum.

„Það er ekki hægt að fá betra hrós en að fólk komi til manns með tillögur að enskum texta," sagði Pétur Örn. Þeir félagar hafa til 15. mars til þess að vinna með lagið en þá rennur skilafrestur út fyrir lokakeppnina.

„Annars erum við ánægðir með lagið eins og það er. Við skoðum það þó og sjáum hvort við getum bætt það eitthvað," sagði Örlygur Smári.