Sjálfstæðismenn funda um mögulega vantrauststillögu

Sjálfstæðismenn funda um möguleika á að leggja fram vantrauststillögu á hendur Steingrími J Sigfússyni atvinnuvegaráðherra í dag. Stjórnmálafræðingur segir umræðu um vantraust geta veikt ríkisstjórnina enn frekar jafnvel þótt tillagan verði ekki samþykkt.

Í fréttum okkar í gær sögðum við frá því að Framsóknarmenn og Sjálfstæðismenn hafi um nokkurt skeið velt fyrir sér möguleikanum á því að leggja fram vantraust á ríkisstjórnina en eftir að Jón Bjarnason sagði sig úr þingflokki vinstri grænna í síðustu viku er stjórnin einungis með þrjátíu þingmenn sem er tveimur mönnum frá lágmarksþingmeirihluta.

Þá þykir þingmönnum þessarra flokka viðbrögð ríkisstjórnarinnar og þá sérstaklega Steingríms J Sigfússonar atvinnuvegaráðherra gefa tilefni til þess að tími sé kominn til þess að leggja fram vantraust. Meðal sjálfstæðismanna er einnig rætt að leggja fram vantraust einungis á einn ráðherra, Steingrím J, en ekki ríkisstjórnina í heild sinni. Stefanía Óskarsdóttir stjórnmálafræðingur sagði í samtali við fréttastofu í morgun að slíkt hafa tíðkast í gegnum tíðina þegar ákveðin deilumál koma upp en slíkt sé ekki algengt og hafi einungis einu sinni verið samþykkt árið 1911.

Þá segir Stefanía ólíkelgt að vantrauststillaga yrði samþykkt svo stuttu fyrir þinglok sérstaklega þar sem þingmenn Hreyfingarinnar muni að öllum líkindum ekki vilja slíta þingi strax áður en stjórnarskrár málið hefur verið afgreitt. Hins vegar geti umræða um vantraust veikt ríkisstjórnina enn frekar eins og gerðist þegar síðasta vantrauststillaga var lögð fram af Bjarna Benediktssyni í apríl 2011 en þá gekk Ásmundur Einar Daðason úr þingflokki vinstri grænna og í þingflokk framsóknarflokksins. Þá sé óvíst hvenær kosningar yrðu haldnar ef vantraust yrði samþykkt og hvort að ríkisstjórnin myndi sitja þangað til, þar af leiðandi sé margt sem þurfi að skýra áður en tillagan er lögð fram.

Þingflokkur sjálfstæðismanna fundar nú eftir hádegi og mun þá samkvæmt heimildum fréttastofu möguleg vantrauststillaga verða rædd.