Naut veitinga víða án þess að greiða fyrir

Reykvískur karlmaður hefur verið dæmdur fyrir að hafa blekkt starfsfólk á Kaffi París við Austurstræti í ágúst síðastliðnum með því að hafa pantað og neytt veitinga að andvirði 15. 280 krónur, án þess að geta greitt fyrir.

Nokkrum mánuðum síðar blekkti hann starfsfólk veitingastaðarins Pizza Hut í Smáralind í Kópavogi þegar hann pantaði og neytti þar veitinga að andvirði 5.830 krónur, án þess að geta greitt fyrir.

Mánuði síðar blekkti hann svo starfsfólk veitingastaðarins TGI Fridays í Smáralind í Kópavogi þegar hann pantaði og neytti þar veitinga að andvirði kr. 5.040, án þess að geta greitt fyrir.

Ákærði kom fyrir dóminn við þingfestingu málsins og játaði þá háttsemi sem lýst er í ákæru. Krafðist hann vægustu refsingar sem lög leyfa en hann kvaðst vera að taka á áfengisvanda sínum og fara á göngudeild SÁÁ daglega.

Hann var dæmdur í mánaðarfangelsi, skilorðsbundið til tveggja ára.