Segir eineltið ekki hafa verið ímyndun

Jón Gnarr borgarstjóri segir það rangt, sem haldið hefur verið fram, að upplifun hans á einelti í Grafarvogi í gær hafi verið ímyndum. Skrif hans um eineltið hafa vakið gríðarleg viðbrögð í dag. Fjölmargir hafa brugðist við bæði á Facebook og víðar.

„Ég vona að ég hafi, með skrifum mínum í gær, hrundið af stað gagnlegri umræðu. Ég upplifi stuðning, virðingu og skilning frá flestum vegna þessa. Ég þakka fyrir það. Einn og einn er þó með sérkennileg viðhorf; annars vegar að upplifun mín af ofbeldinu í gær hafi verið mín ímyndun á einhverju sem hafi ekki átt sér. Það er bara rangt," segir hann í dagbókarfærslu á fésbókinni.

Borgarstjóri segir að hitt viðhorfið sé athyglisverðara. „Það virðist mörgum finnast í lagi að veitast að fólki, með þessum hætti, sem starfar í stjórnmálum og stjórnmálafólk eigi að vera undir það búið og ekki vera með eitthvað "væl." Viljum við svoleiðis stjórnmál? Viljum við lýðræði þar sem fólk nær árangri með hávaða, frekju og ógnnum?" segir Jón Gnarr.