Mátti ekki miðla upplýsingum um þá sem urðu fyrir heimilisofbeldi

Persónuvernd hefur úrskurðað að Landspítalanum (LSH) hafi verið óheimilt að láta af hendi lista yfir sjúklinga vegna rannsóknar um ofbeldi í nánum samböndum vegna rannsóknar manneskju sem stóð að verkefninu „Rannsókn á heilbrigðisþjónustu varðandi ofbeldi í nánum samböndum".

Þá hefur Persónuvernd lagt fyrir LSH að yfirfara vandlega allar öryggisráðstafanir sem viðhafðar eru þegar starfsfólk spítalans fer í gögn hans og sækir sér efnivið í eigin rannsóknir. Þetta kemur fram í áliti Persónuverndar sem birtist á vef stofnunarinnar í dag.

Um málsatvik segir í kvörtuninni, sem barst Persónuvernd í mars á síðasta ári frá lögmanni kvartanda:

„[U]mbjóðandi okkar leitað[i] á göngudeild geðdeildar Landspítalans vegna andlegrar vanlíðunar árið 2011. Við komu á göngudeildina var umbjóðanda okkar gert að fylla út eyðublað með helstu persónuupplýsingum, m.a. netfangi, en útfylling eyðublaðsins var skilyrði þess að umbjóðandi okkar fengi þjónustu á göngudeildinni.

Nokkrum mánuðum síðar fékk umbjóðandi okkar meðfylgjandi fjöldatölvupóst sem innihélt beiðni um þátttöku í rannsókn varðandi ofbeldi í nánum samböndum, en í tölvupóstinum segir:

Þú ert beðin(n) að taka þátt í þessari rannsókn vegna þess að þú hefur nýlega notið þjónustu bráðamótttöku eða göngudeild geðsviðs LSH.

Með útsendingu tölvupóstsins með þessum hætti er ljóst að Landspítalinn og/eða Háskóli Íslands hafa brotið með alvarlegum hætti gegn friðhelgi einkalífs umbjóðanda okkar og er hér með kvartað yfir framangreindri háttsemi."

Í niðurstöðu Persónuverndar segir meðal annars að miðlun Landspítala á nafnalista til rannsakenda er vinnsla persónuupplýsinga í skilningi laganna og fellur þar af leiðandi undir úrskurðarvald Persónuverndar, sem ekki var leitað í þessu tilfelli.

Þá viðhafði Landspítali ekki nægar öryggisráðstafanir við miðlun persónuupplýsinga úr sjúkraskrárkerfi spítalans til þess sem stóð að verkefninu að mati Persónuverndar.

Úrskurðinn má nálgast hér.