Olíuiðnaðurinn bíður eftir að komast í Jan Mayen-gögnin

Olíustofnun Noregs hyggst innan tveggja mánaða birta áætlun um verðmæti olíu- og gaslinda á Jan Mayen-svæðinu. Helsti áhrifamaður norska olíuiðnaðarins segir auðlindamatið ráða miklu um hversu mikill áhugi verður á olíuleit þar.

Hann er forstjóri ConocoPhilips í Noregi og jafnframt formaður samtaka norska olíu- og gasiðnaðarins og heitir Steinar Våge. Á Norðurslóðaráðstefnunni í Tromsö í síðustu viku flutti hann erindi um olíuvinnslu við erfið skilyrði á heimskautasvæðum og var einnig á pallborði með utanríkisráðherrum Svíþjóðar og Noregs.

Steinar Våge segir að norski olíuiðnaðurinn hafi vissulega áhuga á Jan Mayen-svæðinu en menn bíði eftir að sjá hvort norska Stórþingið ákveði í vor að leyfa þar olíuvinnslu.

„Við bíðum öll eftir því hvað norsk stjórnvöld vilja gera þarna," segir Steinar Våge í viðtali við Stöð 2.

„Auk þess eru upplýsingar og væntingar á svæðinu lítt þekktar innan greinarinnar. Það er því of snemmt að segja til um hve áhugavert þetta verður. Við verðum fyrst að vita hvort stjórnvöld vilja opna svæðið og síðan fá aðgang að upplýsingum um bergmálsmælingar og slíkt."

Vitað er að norski olíuiðnaðurinn hefur lengi þrýst á að umdeild svæði nær Noregsströndum, kennd við Lófót og Vesturál, verði fyrst opnuð. En er það svo að Jan Mayen-svæðið þykir ekki spennandi?

„Við vitum auðvitað að þetta er langt frá þjónustukerfinu, þetta er nýtt svæði í mikilli fjarlægð og það krefst tiltölulega mikillar fjárfestingar til að hægt sé að hefja starfsemi þar, hvort sem það er að leita og síðan, - ef eitthvað finnst, - að hefja vinnslu. Þetta skiptir miklu máli en það fyrsta og mikilvægasta er að kortleggja hvað svæðið getur gefið af sér," segir Steinar Våge.