Enginn möguleiki á að úrslitum hafi verið lekið

„Það er enginn möguleiki á því, vinnulagið og verklagið tryggir það. Það sem birtist í nafnlausum slúðurdálki í einu blaði er ekki beint áríðandi," segir Eysteinn Eyjólfsson, upplýsingafulltrúi Samfylkingarinnar, aðspurður hvort að mögulegt sé að úrslitum í formannskjöri flokksins hafi verið lekið til fjölmiðla.

Í skoðanadálknum Tý í Viðskiptablaðinu í dag segir orðrétt: „Tilkynnt verður um nýjan formann Samfylkingarinnar á landsfundi flokksins um helgina. Heimildir Týs herma að Árni Páll Árnason hafi borið sigur úr býtum í baráttunni við Guðbjart Hannesson."

Nú í ár var í fyrsta skiptið kosið um formann flokksins rafrænt og lauk kosningunni á mánudaginn klukkan 18. Tilkynnt verður um nýjan formann á laugardaginn klukkan 11:30.

Eysteinn segir engan fót fyrir þessu orðum í Viðskiptablaðinu enda hafi kosningakerfinu verið lokað á mánudaginn og þá hafi fjölmörg atkvæði borist bréfleiðis í vikunni. „Þeir eiga eftir að fara yfir bréfatkvæðin og stemma við þau rafrænu," segir hann. Það sé kjörnefnd sem sjái um talningu atkvæða en þrír einstaklingar eru í henni.

„Menn verða að halda áfram að bíða spenntir yfir því hver fær að leiða Samfylkinguna. Það er svolítið merkilegt að Jóhanna mun á morgun flytja síðustu setningarræðu sína, akkúrat fjórum árum, upp á dag, frá því hún tók við sem forsætisráðherra fyrir fjórum árum," segir Eysteinn.