Myndarlegur gráhegri heiðrar Hafnfirðinga með nærveru sinni

Það var fallegt um að litast við tjörnina í Hafnarfirði þegar Egill Aðalsteinsson, kvikmyndatökumaður á Stöð 2 og ljósmyndari, leit þar við um helgina. Þar sá hann fallegan gráhegra. Hann er frekar styggur og fljótur að fljúga upp ef menn reyna að nálgast hann. HInir fuglarnir láta hann í friði, en Egill varð var við að endurnar veittu því athygli hvers lags furðufugl væri þarna á ferðinni.

Yann Kolbeinsson, fuglafræðingur á Náttúrustofu Norðausturlands, segir að þarna sé um að ræða ungan fugl sem hafi komið í heiminn í sumar. „Þeir eru tíðir vetrargestir um allt land, þó sérstaklega á SV-landi og suður með landinu austur í Skaftafellssýslur. Þar sjást gjarnan smáir hópar sem halda til saman yfir veturinn í grennd við opið vatn (fiskeldi, heitar uppsprettur, lækir osfrv) á hefðbundnum stöðum og nátta sig stundum í grenilundum þar sem þá er að finna," segir hann í svari til fréttastofu.

Hann segir að á höfuðborgarsvæðinu sjáist þeir gjarnan við Hvaleyrarlón, Urriðavatn, Elliðavatn og Keldur. Á árunum 1979-2007 hafi sést hér að meðaltali um 60 fuglar á ári en komum þeirra virðist hafa fjölgað lítillega á síðari árum. Flest bendir til að gráhegrar sem koma hingað eigi uppruna sinn í Skandinavíu, mögulega að mestu leyti frá Noregi. Stakir fuglar sjást stundum hér yfir sumartímann en ekki er vitað til að þeir hafi orpið hér enn sem komið er.