Íslenska þjóðin var orðin langeyg eftir jákvæðum fréttum

Það fór gleðistraumur um samfélagið í gær vegna tíðindanna um Icesave og það er vitað mál að jafn góðar og þýðingamiklar fréttir hafa góð áhrif út í viðskiptalífið og svo atvinnulífið. Þetta segir framkvæmdastjóri Samtaka verslunar og þjónustu.

Framkvæmdastjóri Samtaka verslunar og þjónustu, Andrés Magnússon, segir vitað mál að góðar fréttir sem og góð lausn á Icesave-deilunni hafi góð áhrif á viðskiptalífið.

„það fór svona gleðistraumur um samfélagið í gær og í dag. Maður hefur fundið það, hvar sem maður hefur komið og í hverjum sem maður hefur heyrt. Það er vitað mál að allar svona fréttir, og þetta er sannarlega stærsta og besta frétt sem við höfum fengið um ára bil, hafa jákvæð áhrif út í viðskiptalífið og munu að öllum líkindum hafa jákvæð áhrif á einkaneysluna, og vonandi líka á fjárfestingar í atvinnulífinu. Þannig að heilt yfir tel ég að þetta muni hafa jákvæð áhrif í viðskiptum," segir Andrés.

Hann segir sæluvímuna öðruvísi en ef landsliðið hefði unnið frækinn sigur og áhrifin langvinnari.

„þetta er óumdeilanlega fyrstu góðu stóru fréttirnar sem við fáum eftir hrun þannig ég held að íslenska þjóðin hafi verið orðin langeyg eftir virkilega góðum fréttum," segir Andrés.