Tíu milljón króna skuld endaði hjá annarri fjölskyldu

Ábyrgðarmenn hjóna sem fóru í greiðsluaðlögun hjá Umboðsmanni skuldara sitja eftir með skuldir þeirra, eða um tíu milljónir króna. Umboðsmaðurinn hefur ítrekað vakið athygli á þessum vanda. Það var ruv.is sem greindi frá málinu.

Þar kemur fram að hjón með þrjú börn sóttu um greiðsluaðlögun hjá Umboðsmanni skuldara í maí 2010 og gengu frá samningi í lok nóvember á síðasta ári. Í ferlinu þurftu þau að selja íbúð sína. Eftir að samningur lá fyrir voru 80% krafna á hendur þeim felldar niður. Þeirra á meðal voru lán sem nánustu ættingjar þeirra voru í ábyrgðum fyrir.

Þar sem lög um niðurfellingu skulda í greiðsluaðlögun ná ekki til ábyrgðarmanna sitja ættingjarnir nú eftir með skuldir hjónanna, alls um tíu milljónir króna. Móðir mannsins fékk áskorun frá lögmannsstofu á dögunum þar sem hún var krafin um rúmar fjórar milljónir króna. Hjónin segja að þau hafi aldrei grunað að þetta yrði niðurstaðan.

Vandinn er tilkominn vegna þess að í nóvember 2010 komst Hæstiréttur að þeirri niðurstöðu að lög um ábyrgðarmenn í greiðsluaðlögun næðu ekki til skuldbindinga sem stofnað var til áður en lögin tóku gildi. Síðan eru liðin rúm tvö ár án þess að tekist hafi að finna lausn.

Í bréfi Umboðsmanns skuldara til hjónanna í þessum mánuði segir að ítrekað hafi verið vakin athygli á þeim vanda sem blasir við í greiðsluaðlögun þar sem ábyrgðarmenn eiga hlut að máli. Í þriðjungi þeirra mála sem eru í vinnslu tryggi ábyrgðarmenn skuldir. Í ákveðnum tilfellum sé verið að færa skuldavandann yfir til ábyrgðarmanna.

Greiðsluaðlögun geti því haft keðjuverkandi áhrif þannig að ábyrgðarmennirnir lendi í fjárhagskröggum og þurfi þá sjálfir að leita til Umboðsmanns skuldara.