Lögreglumaður sýknaður af kynferðisbroti - strauk brjóst í góðri trú

Hæstiréttur Íslands staðfesti sýknudóm Héraðsdóms Reykjavíkur yfir lögreglumanni sem var ákærður fyrir kynferðislega áreitni og sært blygðunarkennd konu, en konan sagði að áreitnin hefði átt sér stað í júlí árið 2011.

Lögreglan var kölluð að bensínstöð þar sem konan vann en hún var kunnug lögreglumanninum. Ástæðan var bensínþjófnaður.

Maðurinn fór með konuna inn á skrifstofu þar sem hann lokaði hurðinni en þar átti hann að hafa áreitt hana kynferðislega með því að „koma því til leiðar að hann gat nálgast hana einslega í lokuðu herbergi við upplýsingaöflun vegna lögregluverkefnis og segja þar við hana að hún væri „alltaf jafn sexý" og stuttu síðar með því að pota tvisvar með penna í vinstra brjóst hennar, snerta hana svo með hendi á sama stað og loks strjúka henni með fingri á hægra brjósti, utan klæða," eins og það er orðað í ákæruskjali.

Lögreglumaðurinn segir að á milli þeirra hafi verið nokkurskonar „daðurssamband" þar sem hún ávarpaði hann „hæ sæti" og hann svaraði í sömu mynt. Þá sagði hann að hún hefði klipið sig í rassinn. Þetta samband hafi verið góðlátlegt.

Myndbandsupptaka af samskiptum þeirra í herberginu lá fyrir hjá dómi en þar var ekki hægt að sjá að maðurinn hefði potað í brjóst hennar með pennanum. Svo virtist sem það færi ágætlega á milli þeirra, meðal annars hafi konan brosað. Sjálf sagði hún fyrir dómi að brosin hefðu verið kurteisisvottur.

Lögreglumaðurinn játaði hinsvegar að hafa strokið brjóst hennar með utanklæða með fingri, en hætt því um leið og konan gaf til kynna að það væri ekki í lagi. Í niðurstöðu dómsins kemur fram að það sé ekki nægilega miklar sakir til þess að sakfella lögreglumanninn um kynferðisbrot þar sem maðurinn strauk brjóst konunnar í góðri trú. Orðrétt segir um þetta brot:

„Að þessu virtu er það mat dómsins að ákærði hafi verið í góðri trú um að háttsemin væri A ekki á móti skapi en hann hætti þegar í stað er hún gaf annað til kynna."

Undir þetta tekur Hæstiréttur Íslands og er maðurinn því sýknaður.