Má bjóða þér að setjast í bankastjórn?

Bankasýsla ríkisins leitar að einstaklingum til stjórnarsetu í fjármálafyrirtækjum. Þetta kemur fram í tilkynningu frá stofnuninni í dag.

Bankasýsla ríkisins fer með eignarhluti ríkisins í Arion Banka, Íslandsbanka og Landsbankanum auk Sparisjóðs Bolungarvíkur, Norðfjarðar, Svarfdæla, Vestamannaeyja og Þórshafnar og nágrennis.

Sérstök þriggja manna valnefnd, sem skipuð er af stjórn Bankasýslu ríkisins, tilnefnir aðila fyrir hönd ríkisins sem rétt hafa til setu fyrir hönd þess í bankaráðum eða stjórnum fyrirtækja á forræði stofnunarinnar.

Stjórn Bankasýslu ríkisins óskar formlega eftir tilnefningum valnefndar um stjórnarmenn fyrir stjórnarkjör í hlutaðeigandi bankaráðum eða stjórnum.

Um hæfisskilyrði stjórnarmanna segir í lögum stofnunarinnar:

Við ákvörðun um tilnefningu á stjórnarmanni skal valnefndin við mat sitt á hæfni aðila taka mið af yfirsýn, þekkingu og reynslu viðkomandi í tengslum við fyrirtækjarekstur og starfshætti fjármálafyrirtækja. Nefndin skal huga að þörfum hvers fyrirtækis fyrir sig og tilnefna stjórnarmenn sem hafa fjölbreyttan bakgrunn hvað varðar menntun og hæfni.

Valnefndin þarf í tilnefningum sínum að huga að samsetningu stjórna fjármálafyrirtækja sem og hæfni þeirra stjórnarmanna sem fyrir eru. Þannig verði gætt að heildaryfirbragði og reynt að tryggja að stjórnir fjármálafyrirtækja verði ekki of einsleitar. Valnefndinni ber að gæta þess í tilnefningum sínum að ekki séu valdir aðilar þar sem möguleiki sé á hagsmunaárekstrum við önnur störf þeirra.

Þá ber valnefndinni í tilnefningum sínum að gæta að öðrum mögulegum

hagsmunaárekstrum s.s. vegna fjárhags- og/eða skyldleikatengsla. Sé um slíka hagsmunaárekstra að ræða kemur viðkomandi aðili ekki til greina sem stjórnarmaður.

Aðili sem valnefndin tilnefnir sem stjórnarmann í tilteknu fjármálafyrirtæki skal uppfylla hæfisskilyrði 52. gr. laga nr. 161/2002, um fjármálafyrirtæki, og í þeim tilvikum sem fjármálafyrirtæki eru hlutafélög, hæfisskilyrði stjórnarmanna sem tilgreind eru í lögum um hlutafélög nr. 2/1995.

Valnefndin skal í störfum sínum fara eftir verklagi Fjármálaeftirlitsins við mat á hæfi stjórnarmanna frá 10. febrúar 2010 og spurningalista því tengdu. Valnefndin skal hafa samstarf við Fjármálaeftirlitið um mat á hæfi eftir því sem þörf er á.

Nánar má lesa um starfið á heimasíðu Bankasýslunnar en þar er einnig hægt að fylla út umsóknareyðublað.