„Dapurlegt raus hjá ASÍ“

„Þetta er óttalega dapurt raus hjá ASÍ og ég vísa þessu auðvitað til föðurhúsanna." Þetta segir Gunnar Ingi Sigurðsson, framkvæmdastjóri Hagkaupa um hugmyndir ASÍ að þær verslanir sem ekki taka þátt í verðlagskönnun sambandsins séu að leit skjóls til verðhækkana.

Starfsmönnum Verðlagseftirlits ASÍ var vísað á dyr í fjórum verslunum í gær, líkt og gerðist í síðasta mánuði. „Þær verslanir sem vilja takmarka aðgengi neytenda að upplýsingum um vöruverð hjá sér eru Hagkaup, Nóatún, Víðir og Kostur," segir í tilkynningu ASÍ. „Verslanirnar virðast ekki tilbúnar til að sýna launafólki samstöðu með því að halda vöruverði niðri og þar með verðbólgunni í skefjum, öllum til heilla."

Gunnar Ingi vísar þessu á bug.

„Það er skrýtið að menn haldi því fram að þetta sé eitthvað leynimakk. Staðreyndin er sú að framkvæmd þessa kannana hefur verið ábótavant hingað til og því er maður nauðbeygður til að taka sig út úr þessu."

Þá gefur hann lítið fyrir fullyrðingar ASÍ um að Hagkaup hafi ekki sýnt launafólki samstöðu með því að vísa starfsmönnum Verðlagseftirlitsins á dyr. „Það er lítið mál að slá sig til riddara og koma með yfirlýsingar."

„Staðreyndin er sú að við eru með um 800 manns í vinnu hjá okkur," segir Gunnar Ingi. „Og það er miður að ASÍ skuli reyna að sverta fyrirtæki sem eru með þeirra eigin félagsmenn í vinnu."

Hann bendir á að kannanir ASÍ hafi ekki verið gerðar á réttum forsendum.

„Epli eru ekki bara epli," segir Gunnar Ingi. „Þarna eru þriðja flokks vörur bornar saman við lúxusvörur og sagt vera sami hluturinn. Með þessu er verið að blekkja neytendur."

„Við erum reiðubúnir að taka þátt í könnunum en ekki á þessum forsendum og það á við um alla," segir Gunnar Ingi að lokum.