"Mér finnst þetta svolítið ósanngjarnt“

„Maður er allur boðinn og búinn til að hjálpa," segir Guðjón Þorbjörnsson sem keyrði fram hjá fjölda bifreiða á höfuðborgarsvæðinu í dag sem hefðu vafalítið vel þegið hans aðstoð.

Guðjón var einn fjölmargra sem lenti í biðröð við Lækinn í Kópavogi í dag en óveður gerði ökumönnum á höfuðborgarsvæðinu erfitt fyrir í dag. Guðjón, sem keyrir um á stórum og stæðilegum 250 Powerstroke pallbíl, segist vel hafa getað hjálpað fjölmörgum sem í vanda voru staddir en taki ekki áhættuna.

„Það er mjög algengt að menn sem eru á svona tækjum og geta hjálpað keyri bara fram hjá. Ef menn draga bíl í gegnum skafl og við það brotnar svunta þá er bótaskyldan þeirra," segir Guðjón.

Guðjón lenti í þeirri leiðinlegu lífsreynslu um árið að reyna að hjálpa ökumanni sem var fastur í skafli. Var kaðall strengdur á milli og gerð tilraun til þess að losa bílinn úr skaflinum.

„Þá slitnaði kaðallinn, lenti á húddinu og skemmdi það. Ég var bótaskyldur," segir Guðjón. Eigandi hins bílsins hafi einfaldlega gefið upp bílnúmer sitt. Tryggingar Guðjóns borguðu brúsann.

„Ég hugsa að það séu fleiri en ég sem vita af þessu. Menn á alvöru bílum sem geta hjálpað," segir Guðjón. Ekki sé þægilegt heldur að keyra fram hjá fólki í vanda sem virðist hugsa sér þegjandi þörfina.

„Ég hefði getað hjálpað fullt af bílum í dag. En svo fær maður illt augnaráð," segir Guðjón og hlær. Hann telur að væru tryggingarlögin á annan veg fengust fleiri til þess að aðstoða samborgara sína.