Þingmenn komnir í kosningaham

Augljóst er á ummælum þingmanna í eldhúsdagsumræðum, sem fram fóru í kvöld að kosningar eru á næsta leyti. Vísir hlustaði á leiðtoga stjórnmálaflokkanna.

Bjarni Benediktsson, formaður Sjálfstæðisflokksins, var fyrstur í pontu og gerði skattaumhverfið að umtalsefni. „Skattar eru of háir og of flóknir. Það er 1501 dagur frá því að þessi ríkisstjórn Samfylkingarinnar og Vinstri hreyfingarinnar - græns framboðs tók við. Á þeim tíma hefur hún gert hátt í 200 breytingar á skattkerfinu. Hækkað skatta, aukið flækjustig og lagt á ný gjöld," sagði Bjarni Benediktsson.

Hann gagnrýndi líka hversu lítil fjárfesting væri og hversu mikill slaki væri í efnahagslífinu. „Stöðnun og verðbólga er einhver sá versti kokteill sem hægt er að bjóða upp á," sagði hann. Engu að síður væri það sá kokteill sem ríkisstjórnin virtist ætla að bjóða upp á við lok þessa kjörtímabils. Hann sagði að það þyrfti að lækka skatta bæði á einstaklinga og atvinnulíf. Þegar horft væri til atvinnulífsins væri tryggingagjald efst á lista. „Vegna þess að tryggingagjaldið er ekkert annað en skattur á atvinnulífið fyrir það að ráða til sín fólk," sagði Bjarni.

Þjóðinni forðað frá efnahagslegu hyldýpi

Árni Páll Árnason, formaður Samfylkingarinnar, ræddi þann árangur sem hefði náðst á kjörtímabilinu. „Ríkisstjórnin forðaði þjóðinni frá efnahagslegu hyldýpi, varði þá sem lakast standa fyrir afleiðingum efnahagshrunsins, náði tökum á ríkisfjármálum og innsiglaði margháttaða sigra í baráttunni fyrir jöfnum tækifærum, borgararéttindum og jafnrétti," sagði Árni Páll. Hann gerði líka gjaldmiðlamál að umfjöllunarefni og sagði að kostnaðurinn við krónuna næmi á hverju ári fimmföldum rekstrarkostnaði Landspítalans. Þá vakti hann athygli á orðum Jóns Sigurðssonar, forstjóra stoðtækjafyrirtækisins Össurar, sem skrifaði grein í Fréttablaðið í dag um að fyrirtækið gæti ekki búið við núverandi rekstrarskilyrði. „Þetta fyrirtæki hefur verið í fararbroddi á heimsvísu og iðnmenntun og verkþekking í landinu á engan glæsilegri fulltrúa. Viljum við missa það og önnur slík úr landi?," spurði Árni Páll.

Raunhæfar lausnir í stað stjórnlyndis eða frjálshyggju

Sigmundur Davíð Gunnlaugsson, formaður Framsóknarflokksins, sagði að hvorki stjórnlyndi né frjálshyggja væru lausn við öllum vanda sem steðjaði að. Leita þyrfti raunhæfra lausna sem byggja á rökhyggju til þess að leysa þann vanda sem fyrir lægi hverju sinni.

Sigmundur Davíð sagði að allir í samfélaginu væru sammála um markmiðið. „Við erum öll sammála um að við þurfum að byggja upp mannsæmandi samfélag þar sem allir geta lifað mannsæmandi lífi og enginn fellur í gegnum öryggisnetið," sagði Sigmundur Davíð. Hann talaði um að verkefnið á næsta kjörtímabili væri að fást við skuldamál heimilannna. Það þyrfti að þora að taka ákvarðanir til að leysa það verkefni.

Mikilvægt að bæta orðræðuna

Katrín Jakobsdóttir formaður VG benti á að við síðustu kosningar hafi hún sagt að skattar yrðu hækkaði og laun lækkuð. Ummælin hafi ekki fallið í góðan jarðveg. „En staðreyndin er sú að það er alltaf betra að fara í sérhvern leiðangur með raunhæft mat á stöðunni," sagði Katrín. En hún benti á að aðstæður væru betri núna en þær hefðu verið fyrir fjórum árum. Ekki yrði vikið framhjá þeim árangri sem hafi náðst við stjórn efnahagsmála og ríkisfjármálum á síðustu fjórum árum. Þá sagði Katrín að mikilvægt væri að breyta orðræðunni í íslenskum stjórnmálum. Þetta hafi hún sagt fyrst þegar hún hafi verið kjörin á þing. En ekki lengur.

Mistókst að breyta fiskveiðistjórnunarkerfinu

Margrét Tryggvadóttir, þingmaður Hreyfingarinnar, sagði að hún myndi bjóða sig fram í næstu kosningum undir merkjum Dögunar. Hún sagði í ræðu sinni að kjör lífeyrisþegar hefðu verið rýrð á þessu kjörtímabili á meðan meira hefði verið hugsað um að verja hag fjármagnseigenda. Nefndi hún Dróma meðal annars í því skyni Margrét gerði líka auðlindamál að umtalsefni. Ekki hafi tekist að gera breytingar á fiskveiðistjórnunarkerfinu. „Maður spyr sig hvers vegna stjórnarflokkarnir hafa ekki staðið við það loforð að kalla inn kvótann," sagði hún. Þá gerði hún líka stöðu stjórnarskrármálsins að umtalsefni og sagði að aldrei í sögunni hefðu niðurstöður þjóðaratkvæðagreiðslu verið hundsaðar. „Munum hverjir stóðu að slíku," sagði Margrét.