Kynferðisleg áreitni innan lögreglunnar útbreytt vandamál

Þriðjungur kvenna  í lögreglunni hefur orðið fyrir kynferðislegri áreitni  oftar en tvisvar sinnum á sex mánaða tímabili  á móti tæplega 18% karla. Konur verða frekar og oftar fyrir kynferðislegri áreitni en karlar.  

 Þetta kemur fram í  könnun sem embætti ríkislögreglustjóra og Háskóli Íslands stóðu fyrir á vinnumenningu meðal starfandi lögreglumanna.  Þar segir að algengt sé að gerendur í kynferðislegri áreitni séu karlkyns.

Þeir sem stóðu að könnuninni segja að  ljóst sé að kynferðisleg áreitni sé útbreitt vandamál innan lögreglunnar  og hún beinist frekar og mun oftar að konum innan lögreglunnar.

Niðurstöður leiða það í ljós að þrjár af hverjum tíu konum hafa orðið fyrir kynferðislegri áreitni í starfi sínu eða í tengslum við starf sitt oftar en en tvisvar sinnum, á undangengnum sex mánuðum. Kynferðislega áreitnin virðist því sjaldnast vera aðeins eitt tilvik, heldur eitthvað sem gerist oft.

Í könnuninni segir að gerendur innan lögreglunnar séu oftast karlkyns samstarfsmenn, en einnig sé það algengt að karlkyns yfirmenn áreiti undirmenn sína með slíkum hætti.

Fjórðungur lögreglumanna þekkir einhvern í lögreglunni sem hefur verið áreittur kynferðislega af samstarfsmanni eða yfirmanni, sem gefur til kynna að fyrirbærið sé félagslega viðtekinn hluti af menningu lögreglunnar. Það mætti ætla þar sem svo margir vita af slíkri áreitni að það yrði eitthvað gert í því, en svo er ekki.

Svör lögreglumanna í könnuninni og viðtöl gefa vísbendingar um að lögreglan og lögreglumenn séu aðgerðarlaus gagnvart vandanum.  Þá segir að ljóst sé að menningin innan lögreglunnar sé mjög óvinveitt konum.

Valdahlutföllum, konum ekki í hag, er viðhaldið með kynferðislegri áreitni og ekki er komið fram við konur af faglegri virðingu sem allir eiga skilið.

Það hversu margar konur upplifa þessa áreitni og segja frá henni í könnuninni vísar til þess að konur eru meðvitaðar um þessa stöðu sína, og kæmi því ekki á óvart að kynferðisleg áreitni útskýrði að einhverju leiti brotthvarfi kvenna frá lögreglunni segir ennfremur í könnun um vinnumenningu innan lögreglunnar.