Mamma Angóla fór í nýrnaígræðslu

Ana Maria Unnsteinsson, móðir bræðranna Unnsteins Manuels og Loga Pedro Stefánssona úr hljómsveitinni Retro Stefson, er nýkomin heim til Íslands eftir að hafa gengist undir nýrnaígræðslu í Gautaborg í Svíþjóð.

„Þetta gekk bara mjög vel,“ segir Unnsteinn Manuel spurður út í aðgerðina, sem var framkvæmd fyrir viku síðan. Hann og Logi Pedro fóru út til Svíþjóðar með móður sinni og voru henni til halds og trausts.

Þetta var þriðja nýrnaaðgerðin sem Ana Maria gekkst undir og að sögn Unnsteins stóð hún sig eins og hetja. Hún dvaldi á sjúkrahúsinu í eina viku og flaug svo heim með sonum sínum á fimmtudag.

Líklega hafa flestir heyrt Önu Mariu getið sem Mömmu Angóla en hún er umfjöllunarefni samnefnds poppsmells Retro Stefson sem var eitt vinsælasta lag sumarsins 2010.