Ungfrú heimur kemur frá Filippseyjum

Hin 23 ára gamla Megan Young frá Filippseyjum var valin Ungfrú heimur 2013 fyrr í dag en keppnin fór fram í Balí í Indónesíu. Annað sætið hreppti hin franska Marine Lorphelin og þriðja sætið Naa Okailey Shooter frá Gana. Sigríður Dagbjört Ásgeirsdóttir var fulltrúi Íslands í keppninni í dag en hún var kosin Ungfrú Reykjavík árið 2011 og hreppti þriðja sætið í keppninni um Ungfrú Ísland sama ár.

„Úrslitin voru svona nokkurn veginn eins og ég hafði reiknað með," segir Sigríður Dagbjört, en fréttastofa náði tali af henni nú síðdegis. Hún segir að stúlkurnar séu nú á leiðinni í galakvöldverð. „Við erum allar mjög spenntar fyrir kvöldinu. Nú verður síðustu klukkustundunum okkar saman eytt í gleðskap."

Sigríður heldur heim á leið í fyrramálið en þá tekur hversdagsleikinn við að nýju. „Ég fer í flug klukkan 10 í fyrramálið að mínum tíma. Svo tekur lögfræðin við og hið venjulega líf. Svo er aldrei að vita hvað maður tekur sér spennandi fyrir hendur. En ég stefni á að ferðast mikið enda er ég nú komin með vinkonur út um allan heim sem ég ætla mér að heimsækja," segir Sigríður, ánægð með árangurinn og dvölina á Balí.

Keppnin verður endursýnd á Stöð 3 klukkan 19:00 í kvöld.