Líkir meðferð á Berki og Annþóri við Guðmundar- og Geirfinnsmálið

Hjörleifur Sveinbjörnsson, þýðandi og eiginmaður Ingibjargar Sólrúnar Gísladóttur, fyrrverandi utanríkisráðherra, líkir meðferð réttarkerfisins gegn Annþóri Kristjáni Karlssyni og Berki Birgissyni við málsmeðferð sakborninga í Guðmundar- og Geirfinnsmálinu.

Í grein sem birtist í Fréttablaðinu á og á Vísi í dag skrifar Hjörleifur meðal annars:

„Stórir hópar í samfélaginu heimtuðu sökudólga og fólk úr heimi stjórnmála og fjölmiðla kynti undir svo úr varð eitruð blanda. Sökudólgarnir fundust m.a. vegna þess að það var argað að þeir yrðu að finnast."

Annþór og Börkur eru dæmdir ofbeldismenn en báðir hafa þeir orðið uppvísir af mjög grófum ofbeldisverkum. Nú dúsa þeir tveir saman á gangi á Litla Hrauni og hafa verið þar í tæpt ár. Ástæðan er sú að þeir eru grunaðir um að hafa orðið samfanga sínum, Sigurði Hólm Sigurðarssyni, að bana í klefa hans í maí á síðasta ári. Rannsóknin hefur tekið langan tíma sé tekið mið af morðrannsóknum síðustu ára. Meðal þess sem beðið er eftir er niðurstaða dómskvadds matsmanns á krufningaskýrslu Sigurðar.

Hjörleifur skrifar að hátt í ársvist á einangrunargangi, með mjög takmörkuðum möguleikum á að hreyfa sig, getur varla verið mannbætandi, eins og hann orðar það.

„Er fangelsið svona vanbúið?" spyr Hjörleifur og heldur áfram: „Er verið að tryggja öryggi einhverra? Og það sem mestu skiptir: Fer ekki að bóla á krufningarskýrslu eftir allan þennan tíma svo botn fáist í þetta mál og hinni löngu einangrun megi ljúka? Ég held að það sé til bóta að fá svör við þessum spurningum."

Grein sína lýkur Hjörleifur svo á þessum orðum:

„Mér dettur ekki í hug að mæla ofbeldisverkum bót. Fyrir mér mega og eiga ofbeldismenn að fá makleg málagjöld en enn og aftur: Þeir verða þá að vera sannir að sök, að undangenginni réttlátri málsmeðferð. Besti punkturinn aftan við Guðmundar- og Geirfinnsmál er að þau endurtaki sig ekki."

Hægt er að lesa grein Hjörleifs hér.