900 ungmennum tryggð vinna í Hafnarfirði

Öllum 14 til 17 ára ungmennum sem sækja um hjá Hafnarfjarðarbæ verður tryggð vinna samkvæmt tilkynningu frá bænum.

Nú styttist í sumarið og umsóknir um sumarstörf hvað varðar aldurshópinn 17 ára og eldri streyma inn til Vinnuskóla Hafnarfjarðar. Þar er um að ræða m.a. störf fyrir flokksstjóra í Vinnuskólann, leiðbeinendur og aðstoðarleiðbeinendur á leikjanámskeiðum, á gæsluvöllum og störf hjá garðyrkjustjóra.

Opnað verður fyrir umsóknir fyrir aldurshópinn 14 – 16 ára í byrjun maí. 17 ára og eldri geta sótt um sumarstarf á www.hafnarfjordur.is en umsóknarfrestur fyrir þennan hóp rennur út 12. apríl samkvæmt tilkynningu.

Í sumar er gert ráð fyrir að Vinnuskóli Hafnarfjarðar ráði um 900 einstaklinga á þessum aldri og munu krakkarnir vinna á hinum ýmsu starfsstöðvum og takast á við fjölbreytt verkefni.

Undirbúningur fyrir sumarið stendur nú sem hæst og starfsfólk Vinnuskóla Hafnarfjarðar / ÍTH vinnur hörðum höndum að því að skipuleggja ánægjulegt sumar fyrir þennan stóra hóp.