Segir myndband tilbúning og hótar málaferlum út af hlekk

"Umrætt myndband er tilbúningur einn af ónefndum aðila sem gert er í þeim tilgangi að skaða æru og trúverðugleika undirritaðs og eftir atvikum þeim samtökum sem undirritaður hefur starfað hjá sem framkvæmdastjóri. Eru hin "meintu svik" auk þess sett upp með þeim hætti að þau kunna að skaða orðspor Slysavarnarfélagsins Landsbjargar. Þá skal tekið fram að það sem fram kemur í umræddu myndbandi er slitið úr öllu samhengi og afbakað með öllu," segir í bréfi Guðmundar Arnar Jóhannssonar sem hann sendi Vísir.is í morgun, en þar hótar hann lögsókn ef Vísir fjarlægir ekki hlekk á myndband á Youtube með samskiptum Guðmundar við annan mann.

Í þessum samskiptum virðast koma fram áform um peningaþvætti og gjaldeyrisbrask. Guðmundur Örn er framkvæmdastjóri Landsbjargar, en hann vék tímabundið frá störfum í gær vegna málsins.

Í myndbandinu ræðir hann við Bóas Ragnar Bóasson athafnamann, en Guðmundur Örn hefur kært hann fyrir fjárdrátt og skjalasvik. Þannig á Bóas að hafa stolið um hundrað milljónum af Guðmundi og athafnamanninum Sigurði Kolbeinssyni, sem sendi fréttastofu yfirlýsingu í morgun þar sem hann áréttaði að búið væri að kæra Bóas fyrir fjársvik.

Í samtali í morgun og í dag sagðist Guðmundur ekki ætla að tjá sig öðruvísi um málið en með því að senda yfirlýsingu á fjölmiðla. Sú yfirlýsing hefur ekki enn borist. Í DV í dag er rætt við Guðmund en þar vill hann ekki ræða viðskiptin sem fram koma á myndbandinu ítarlega. Þráspurður um eðli viðskiptanna af blaðamanni DV svaraði hann því til að hann vildi ekki ræða viðskiptin ítarlega.

Í skilaboðum Guðmundar í morgun til fréttastofu sagði svo að ef myndbandshlekkur á Youtube yrði ekki tekinn út myndi hann kæra Vísi og eftir atvikum stjórnendur fyrir ærumeiðingar og eftir atvikum brot á friðhelgi einkalífsins. Því hefur verið ákveðið að fjarlægja hlekkinn af vefnum í bili. Aftur á móti má finna frétt um málið á dv.is, þar sem lesendur geta kynnt sér málið frekar.